Ален Боске (1919-1998)

Ален Боске (Alain Bosquet), ҳақиқий исми Анатолий Александрович Биск (28 март 1919, Одесса — 8 март 1998, Париж) — француз ёзувчиси ва драматург.

САВОЛЛАР ВА ЖАВОБЛАР

– Бобожон, айтинг, нега
Соқолингиз кўп катта?
– Ўҳ-ҳў, унга қаранглар,
Дейиш учун албатта!

– Чақмоқ чақади нега,
Ёмғир ёғади нечун?
– Болажоним, кемачанг
Сувда сузмоғи учун!

– Юлдузлар кўкда ғужғон,
Оймома керак нега?
– У бизларни кузатиб,
Боқиб туради Ерга.

– Айтинг, вақт бу – нимадир?
– Тиним билмас кемадир!
Улғайганда вақт келиб,
Барин оласан билиб.

Сўнг демассан ҳар куни,
“Ўҳ-ҳў, қаранглар уни!”
Сен вояга етган дам,
Савол бўлмас, соқол ҳам!

УРУҒЧА

Ётавериб зерикди
Митти уруғча.
Пириллаб учиб кетди
Дунё кўришга!

Учавериб туну кун,
Қўнди далага.
Саёҳат ёқиб қолди
Митти болага.

Нур сочиб бобо қуёш
Қиздирди Ерни.
Ухлаб қолди уруғча
Нишлади бурни.

Уруғ очса кўзини
Ёзибди томир.
Кўкка тикка бўй чўзиб
Қад бўпти савр.

Фурсат ўтиб айланди
Улкан дарахтга.
Сабр билан эришди
Бундай шарафга.

Энди ўтган кунларни
Эсламас сира.
Уруғча униб-ўсди,
Қолди хотира.

Рус тилидан Нуруллоҳ Остон таржимаси