Эйла Кивиккахо (1921-2004)

Эйла Кивиккахо (Eila Kivikk’aho) Карелиянинг Сортавала шаҳрида таваллуд топган. Унинг шеърларида ёрқин қатъийлик ва кучли юмор руҳи устувор. Шоира новатор шоира сифатида танилган.Таржимон сифатида дунё ўсмирлар ва болалар адабиётидан кўплаб асарларни фин тилига ўгирган.

ТАШХИС

Юрагинг кулбасин моғор босган, нам,
ёғоч деворлари чирик, бенаво.
Остона ҳатласа тақиллаб пошнам,
эшик очса қўлим – дардига даво.

Кулба деворларин чиритар ҳижрон,
висолсиз тонг отса нурсиз бўлур кун.
Кулба қадамларни қўмсаган ёмон –
юрак айрилиқдан зада бўлган, хун.

Кулба, ёр қадами билан шовқин қил,
ўчоқни ёқ, қишги кўз ёшни қурит.
болор-ёғочларинг барг ёзсин яшил,
юракдан ҳажру ғам моғорин арит.

АЁЛ

Мен дарахт бўлганимда эди
илдизларимни суғуриб,
чопиб борар эдим
сенинг деразангнинг ёнига.

Афсуски, мен дарахт эмасман,
деразамнинг ёнида
сени кутиб ўтирибман
ёлғиз.

Рус тилидан Рустам Мусурмон таржимаси