Martin Opits (Martin Opitz; 23 dekabr 1597, Buntslau — 20 avgust 1639, Dantsig) — nemis shoiri, klassitsizm yo‘nalishida ijod qilgan ilk nemis shoirlaridan biri.

* * *

Har yonda xiyonat, aza, uqubat,
Qabohat ostida qurigan ilik.
Yolg‘on avjidadir, go‘rda – haqiqat,
Zulm ardoqdadir, quvg‘in – yaxshilik,

Sodom va Gomorra dunyosidir bu, —
Men notavon qandoq, zulm o‘tgan sayin,
Kullarni, qonlarni, zulmatni ko‘rmay,
Muhabbat haqida qo‘shiq kuylayin?!

Nozik, gulbadanlar, qimtingan lablar?!
Bu she’rlar o‘likdir, bo‘m-bo‘shdir, axir,
Ozurda qalblarga keraksiz, tamom!

El dardini yozgin! Payt keldi! Yo‘q-sa,
Sen — shoir emassan. Sen — qofiyaboz.
Seni endi mangu tark etsin ilhom!

Karim Bahriyev tarjimasi