Тиё-ни (千代尼; 1701—1775) — япон шоираси. Кага провинциясида туғилган. 1753 йили Тиё монахликка ўтиб, умрининг охиригача монастирда хизмат қилади.

***

Тўлин ойли тун.
Ҳатто қушлар ёпмади
Ин эшигини.

* * *

Оҳ, танҳо ёрқин ой!
Мен юрдим сен томон, сен томон,
Аммо сен ҳамон йироқ.

Вафот этган гўдакни эслайман

Дераза қоғозини
Энди ким ҳам тешарди.
Қандай совуқ бу хона.

Рауф Парфи таржимаси

* * *

Тунда чирмашди чирмовуқ
Қудуғимнинг пақирига…
Сув сўрайман ҳамсоямдан!

* * *

Қўлимда қармоқ.
Қармоғимнинг ипига сал илинди
Ёз ҳилоли.

* * *

Дарё мавжлари узра
Ўзининг соясини
Тутар, тутар ниначи.

* * *

Ой тўлган кеча!
Ҳатто қушлар ошёнларининг
Эшикларин ёпмадилар.

* * *

Заъфароннинг гулида шабнам!
Улар ерга тўкилганида
Айланади оддий бир сувга…

ШЕЪР ЁЗАЁТИБ

Мен: “Оҳ какку, оҳ какку”, дея
Қайта-қайта таъкидлагунча
Аллақачон тонг отиб бўлди.

* * *

Оҳ, тўлин ой!
Йўл юрдим, йўл юрдим сен томон,
Узоқдасан, бироқ сен ҳамон.

* * *

Эшитилар фақат товуши…
Кўринмас оқ қарғалар
Тонгда ёққан қор узра.

* * *

Ухлаётган капалак!
Тушда нимани кўрди?
Қанотларини қоқди.

* * *

Лабларимнинг бўялганин
Ҳам унутдим…
Тоза булоқ!

Рус тилидан Турсун Али таржимаси