Багатер Арабули (1951)

Багатер Арабули (ბაღათერ არაბული) – грузин шоири. Грузия политехника институтини тамомлаган. 12 та шеърий китоби чоп этилган. Шеърлари испан, италян, монгол, болгар, рус, украин, арман ва бошқа тилларга таржима қилинган. У Грузия Ёзувчилар уюшмаси раиси.

НАҚҚОШ ИРАКЛИЙ ОЧНАУРИ УСТАХОНАСИДА

Кўк керилди, бўлди баландлагандай,
Бу қуёшдан лолман; босди титроқ – чўнг:
Бунда, қўл буюрар:“Металл, қўшиқ айт”,
Металл эса оддий, ўша кару гунг.
Бунда, қўнғироқлар уйғотар қалбни,
Ҳар гал, юксалишга даъватлар этар,
Уни ой қаноти, Опизарларнинг
Қадимий нафаси сийпалаб ўтар.
Шу он, ромдан чиқиб, бир қиз ёнимга –
Яқинлар, қўлида ой-чирмандаси.
Қанча вақт ўт ёқди бу рақс жонимга?
Унга устоз, машшоқ, ҳофиз ким асли?
Бутун чўлни қуёш ёнғини қамрар,
Чарақлаган жомда юлдузлар тинмас,
Қайдадир, яқинда йиғлайди Тамар
Ҳамда Руставели сози берар сас.
Сарбаланд этишди мени – мен беҳуш:
Деворлардан, ватан юзланди шунда,
Мўйқалам, кескичдан наф етарми, хўш,
Сеҳргарлик ўзи афсунлар бунда.
Кифтимдан қуюлди самовий ёлқин,
Ёмғир тинмай ёғиб тургандай шаррос,
Деворлардан тушиб, жўшқин ва сокин –
Халқим суҳбат қурди мен билан – ҳассос.

* * *

Ким кириб боғимга, мевали, қутли
Муҳаббатга ҳавас билан боқаркан?
Гуллаган-яшнаган, ўтлию шудли
Вафо нурларига суқи оқаркан?
Ёзнинг иссиғида, соя, япроқлар –
Остида, ким вақтин ўтказаркан хуш?
“Серқуёш бўлар кун” – тонготар чоғлар
Хушхабар етказгай кимга бийрон қуш?
Ким очаркан боғим эшигин сизлаб,
Сахий муҳаббатнинг даврасин излаб.

Муҳаммадали Қўшмоқов таржимаси