Aleksandr Vampilov 1937 yilda Irkutsk viloyatining Kutilik posyolkasida o‘qituvchilar oilasida tavallud topadi. Ammo u otasini ko‘rolmaydi – ayni Aleksandr tug‘ilgan kunlarda Nikita Vampilov tuhmat balosiga uchrab, “xalq dushmani” sifatida qamaladi va otishga hukm etiladi, 1957 yilda esa oqlanadi.
Aleksandr o‘rta maktabni tamomlagach, universitetda ta’lim oladi. Dastlab kichik hikoya, ocherk va maqolalar yozadi. 1964 yilda esa ilk dramtik asari “Iyundagi xayrlashuv”, 1967 yilda “Katta o‘g‘il”, so‘ng “O‘rdak ovi” pesalari bilan rus dramaturgiyasida o‘ziga xos uslubga ega bo‘lgan mualliflardan biriga aylanadi. Bu asarlarning asosiy mavzusi – ijtimoiy qoloqlik, yovuzlik va razillikka qarshi kurashdan iborat. Uning asarlarida hamisha, bir qarashda, tushunish ancha murakkab bo‘lgan muammolar talqin qilinadi.
“O‘rdak ovi”ni tarjima qilish jarayonida dramaturg haqida o‘zim tugal anglay olmagan mavhum bir fikr paydo bo‘ldi: uning o‘z vaqtida ko‘pgina munozaralarga sabab bo‘lgan “O‘rdak ovi” pesasidagi bosh qahramon – o‘sha zamonning fojiaviy obrazlaridan biri bo‘lmish Zilov qisman muallifning o‘zi bo‘lsa kerak, degan fikrga keldim. Uning bevaqt, fojiali o‘limi ham bu fikrimni tasdiqlab turgandek.
A. Vampilov 1972 yilda ayni navqiron chog‘ida – 35 yoshida Baykal ko‘liga cho‘kib, fojiali ravishda halok bo‘ladi.