Xurshid Nurullayev. Zukkoyevning yangi mehnat faoliyati (hajviya)

Zukkoyev bir oy ichida deyarli barcha xodimlarning e’tiborini qozondi. Uning ish joyi shahar markazidagi o‘ttiz qavatli  binoning yetinchi qavatida joylashgan bo‘lib,  qavatda ularning yuqori tashkilotiga bo‘ysunadigan yana uchta   boshqarma faoliyat ko‘rsatar, xodimlarning umumiy soni yuztadan oshmasdi. Zukkoyev bir hafta ichida qavatdagilar bilan tanishibgina qolmay,  ular orasida alohida hurmatga  sazavor bo‘lishga ham ulgurdi.                             
Ishning birinchi kuni  bo‘lim boshlig‘i Zukkoyevni  o‘z xodimlari bilan  tanishtirarkan,  unga hamkasblari bilan hamkorlikda ishlashni,  faqat shundagina yaxshi natijalarga erishish mumkinligini  o‘qtirdi.
– Xo‘sh, boshladikmi? – xona to‘ridagi stolni egallagan  semiz kishi xonani bo‘lim boshlig‘i tark etishi bilan  stol tortmasidan  gazeta chiqarib,  hammaga savol nazari bilan tikildi.
– Boshladik.
– Xorij harbiy samolyoti.
Hamma o‘yga toldi. Zukkoyev majburiy xizmatda bo‘lganida  harbiy texnikaga oid ma’lumotlarni puxta egallagandi. Shuning uchun bir necha samolyot nomini aytdi.
– «Yaguar» to‘g‘ri keldi. – Semiz kishi gazetaga so‘zni yozarkan, xonadagi ikki hamxonasiga o‘xshab, taajjublanganini  yashirmadi.- Xo‘sh, keyingisi suv o‘ti.
Zukkoyevga o‘simlik dunyosi besh qo‘ldek ma’lum edi. Shu sababli hamkasblarining  o‘ylab o‘tirishiga imkon qoldirmadi. Uning topqirligi bilan  gazetaning bir betini egallagan krossvord  yechimi  bir soatda hal bo‘ldi. Semiz kishi gazetani olib chiqib ketdi.
Tushdan so‘ng bo‘lim boshlig‘i xodimlarni chaqirib,  krossvord bahsida g‘alaba qozonilgani uchun  ularga minnatdorchilik bildirdi. Qolgan boshqarmalar esa  boshqotirmaning yarimini ham yechib ulgurishmagan ekan.
Ertasi kuni Zukkoyevni gazeta sotib olish ro‘yxatiga kiritishdi. Qavatdagi to‘rtta boshqarma boshliqlari tomonidan  shaxsan tasdiqlangan ushbu ro‘yxat sahifalarida krossvord chop etiladigan gazetalar nomi, ularning sotuvga chiqish vaqti va gazetani sotib olishi lozim bo‘lgan xodimlarning nomlari bitilgan ma’lumotdan iborat edi.
Umuman, Zukkoyev ishxonada o‘rnatilgan tartibga  qoyil qoldi.  Ertalab, agar gazeta sotib olish uchun kechikkanlarni istisno qilganda,  hamma o‘z vaqtida ishda bo‘lar,  rahbariyat  yechimi umumjamoa hukmiga  havola etiladigan  krossvordni tanlaguncha, bunga bir soatcha vaqt ketardi, xodimlar o‘z vazifalarini tezlik bilan bajarishar, so‘ng har kunlik asosiy ish bulgan krossvord savollariga javob topishga o‘tilardi.  
Ish boshlangandan so‘ng ikki soatlar o‘tib, boshqarmada ish shunchalar qizg‘in tus olardiki, chetdan qaragan odam xodimlarning ishga bo‘lgan fidoyiligidan hayratlanmay qolmasdi.
Zukkoyev ishlaydigan xona xuddi chumoli uyasini eslatardi. Eshik har lahzada ochilib yopilar, boshqarma xodimlarining kirib chiqishi kanda bo‘lmasdi. Albatta Zukkoyev ba’zi ma’lumotlarni bilmasdi, lekin ularni qayerdan olish kerakligini bexato aytardi.
Telefonlar orqali so‘rovlar bir on tinmasdi.  
– Alyo, bu televideniyemi? Sizlar  qachon tashkil topgansizlar?
– Kechirasiz, tibbiyot institutimi, bel og‘rig‘ining lotincha nomini aytib yuboring.
– Falsafa institutimi, iltimos, xudolarning nomlarini faksdan jo‘nating.
Shunday surovlar,  yo‘laklardagi yugur-yugurlar davom etayotgan bir vaqtda kotibaning hammani  birinchi kunlar hayron qoldirgan, endi esa qandaydir asabga tegadigan xitobi yangrardi.
– Zukkoyev topshiriqni bajaribdi-i-i.
Belgilangan ishlarning bu qadar tez bajarilishi  qavatdagi muhitga  ta’sir etmay qolmadi, albatta.  Har kuni bitta boshqarmaning ustun kelayotgani, eng yomoni, ish vaqti tugamay xodimlarning ishsiz qolayotgani ularning ishga bo‘lgan qiziqishi sussayishiga olib kelgandi. Zukkoyevning o‘ta bilimdonligi vujudga kelgan salbiy holatning asosiy sababi ekanini birinchi galda rahbarlar anglab yetishgandi. Shuning uchun ular jamoalaridagi vaziyatni oldingi holatga keltirish borasida fikr almashishni boshlab yuborishdi. Shunday bir vaqtda yuqori tashkilotdan rahbarlik lavozimiga  nomzod so‘rab qolishgani ularga qo‘l kelib, bu o‘ringa Zukkoyevning nomzodini bir ovozdan taklif etishgani hech kimni hayron qoldirmadi. Aksincha,  kuzatish marosimida so‘zga chiqqan barcha Zukkoyevni ta’riflab, uning yangi ishiga omad tiladilar.  Bunday bilimdon mutaxassisning oralarida bo‘lmasligi jamoaga ancha qiyinchiliklar tug‘dirishini izhor etarkanlar,  yuzlaridagi  mamnunlikni yashirolmasdilar.
Afsuski sobiq hamkasblarning quvonchi ko‘pga cho‘zilmadi. Rahbarlikka ko‘tarilgan Zukkoyev ilgarigi ishiga shunchalar o‘rganib qolgandiki, har kuni ertalab boshqarma boshliqlarini chaqirib,  ularga krossvordlar bo‘yicha topshiriqlar berar, kun oxirida esa ulardan javob talab etarkan, qarshisida o‘z vazifasini uddalay olmagan bechoralarning xayolidan bir xil o‘y kechayotgani,  qo‘l ostlarida ishlagan xodimning yuqori tashkilotga o‘tganidan pushaymonliklarini bilmasdi.