O‘zbekiston Respublikasi san’at arbobi. 1927 yilda tug‘ilgan. Samarqand davlat universitetini bitirgan. “Mening tug‘ilgan kunim”, “Zafaron ohanglari”, “Sening qalbing”, “Muhabbat xayollari”, “Ulug‘lik”, “Temurnoma”, “Munojot” singari she’riy kitoblari nashr etilgan. Shoir 2009 yilda vafot etgan.

SINIQ BIR ARMON

Peshonaga yozug‘lik ekandir hijron,
Avj pardada uzildi rubobning tori.
Muallaq turibdi siniq bir armon,
O‘ksingan ko‘ngilning nolayu zori.

Men u choq sevgining og‘ushida g‘arq
Zarrin ufqlarda kezardim go‘yo.
Visol ne, hijron ne, qilmas edim farq,
Go‘yo sadoqatga to‘liqdir dunyo.

Sen yaxshi ko‘rarding, yaxshi ko‘rarding,
Eru ko‘kka ham ishonmasding, axir.
Yaxshi ko‘rmoq nadir, jondan suyarding,
Faqat ikkimizga ayondir bu sir.

O‘zimning qismatim qo‘yib bir yoqqa
Sening taqdiringni o‘ylayman bu dam.
Biz kezgan yo‘laklar qoldi yiroqda,
Shukrona qilaylik shunisiga ham.

Ufqda so‘qmoqlar, yo‘llaring uzoq,
Taqdir vafo qasri tomon yo‘llasin.
Seni deb ibodat qilurman bu choq,
Bu yog‘iga endi o‘zi qo‘llasin!

QUYoSh PARChASI

Kaftim uzra tutib quyosh parchasin,
Sening qo‘llaringga uzatdim, erkam.
Neki ezgulik bor dilda, barchasin
Senga bag‘ishladim, senga farishtam!

Yaxshi niyat ila qabul et uni,
Butun borlig‘ingni aylagay ravshan.
Hasadli ko‘zlardan asragay seni,
Poyingda gullagay bir ajib gulshan.

Quyosh parchasi deb senga tutganim,
Saxovatga to‘la munis yurakdir.
Istiqbolingga havola etganim,
Qarashlarga zor, o‘sha tilakdir.

Neki ezgulik bor dilda, barchasin
Senga bag‘ishladim, senga farishtam!

NEChA KUNKIM

Necha kunkim, parishondir xayolim,
Necha kunkim, dilim erur g‘ash.
Nahot, bir so‘ramading, nigoro, holim,
Vujudim yondirar pinhoniy otash.

Kimnidir kutadi bezovta ko‘ngil,
Kimnidir izlayman bo‘m-bo‘sh xonada.
Iztirob chekadi xonamdagi gul,
To‘kilgan barglarin ko‘rib yonida.

Eshikka javdirab qarar ko‘zlarim,
Tiq etsa sevinchdan entikar yurak.
Ba’zida adashib ketar so‘zlarim,
Nachora, bugun ham bo‘lmadi darak?!

Ko‘zimga tor etib so‘ngsiz dunyoni,
Javonda kitoblar turishar qator.
Toshoyna izlaydi tanish siymoni,
Sukutda turmishdir chang bosgan dutor.

Tong otar, kun botar – o‘tar bugun ham,
Har daqiqa menga tuyular bir yil.
Oromimni olmish hasratu alam,
Kimnidir kutadi bezovta ko‘ngil.

OYNING KUMUShRANG TANGALARI

Oyning kumushrang tangalari
Taqdir yo‘llariga birlashib,
Anhor mavjlariga qo‘shilib,
Sapchib borayotir qirg‘oqlar sari.

Dengiz – so‘ngsiz, ufqlar – so‘ngsiz,
Quyosh botayotir, qip-qizil alvon.
Samoning etagi yonmoqda, sonsiz
Parcha-parcha bulutli osmon.

Go‘yoki yirtilgan oq shohi ro‘mol
Ko‘piklarga qo‘shilib titrar beorom.
Osmon gumbazida g‘aroyib bir hol,
To‘lqinlar uzrakim – kumush to‘la jom.

Oyning kumushrang tangalari
Anhor mavjlariga qo‘shilib,
Toshib borayotir qirg‘oqlar sari
To‘lqinlar qatiga o‘zin yashirib.

ARIQ BO‘YIDA TURIBMAN

Ariq bo‘yida turibman, ming xayol,
Ming xayolda suvga termilib.
Zilol to‘lqinlar oqmoqda, ehtimol,
Xayollarim oqmoqda suvday bo‘lib.

Yo‘q, xayolmas, bu obi hayotdir,
Goho mavjli, gohida to‘lqinli.
Sokin yashamoqlik uning-chun yotdir,
Kumush zarralarki: o‘tli, yolqinli.

Bir maromda oqib o‘tayotir,
Jimirlab, oq ko‘piklar taratib.
O‘z yo‘lida, qaylargadir ketayotir
Va o‘tgan izida hayot yaratib.

Men turibman hamon ariq bo‘yida
Go‘yoki xayollarim oqib ketmoqda.
Suv ham emas, xayol ham, umr ham o‘tmoqda,
Ariq bo‘yida turibman, suvga termilib.

Ming xayol…

QATRALAR

Qatralar!
Biz sevgan ulkan hayotning
Bir butun mazmuni sizda mujassam.
Ufqsiz, sarhadsiz shul koinotning
Ipidan ignasi sizda erur jam.

Qatralar!
Tong mahal gul yaprog‘ida
Mavjlanar bir yog‘du ichra miltirab.
Hijronda termilgan, yer yonog‘idan
To‘kilar, go‘yoki simobday titrab.

Qatralar!
Hech qachon etmagay inkor
Tabiatning so‘ngsiz ulug‘ligini.
Men, aslo, tasavvur qilmayman zinhor,
Hayotning qatralarsiz to‘liqligini.

Qatralar!
Birlashib seni sog‘-omon
Mehru muhabbat-la ko‘tardi do‘stim.
Buyuklikni sevgan, ey aziz inson,
Jajji qatrani ham unutma bir zum.

OLISDAMAN

Qo‘y, endi izlama! Urinish behuda,
Men ketyapman tumanlar aro.
Sen olisdacan, olisdacan juda,
U yog‘i – so‘ngsiz qorong‘i dunyo.

Afsuslar va balki ko‘zyoshlar
Senga sabr bersin ilohim!
Qalbingdan xotira – o‘sha shirin tushlar,
Ro‘yoda burqsigan tutunli ohim.

O‘sha olislardan, tumanlar bag‘ridan
Senga termiladi ko‘zlarim.
O‘tdim, muhabbatsiz dunyoning bahridan,
Anhor bo‘ylarida so‘nggi izlarim.

Qo‘y, endi izlama!..