Юхан Вийдинг Таллинда, атоқли шоир ва адиб Паул Вийдинг оиласида таваллуд топган. Юри Юди (Jüri Üdi) – унинг тахаллуси. 1972 йил Таллин Давлат консерваториясининг театр санъати ва драматургия факультетини тамомлаган. Унинг кўплаб шеърий тўпламлари, драмалари чоп этилган, шу билан бирга у актёр сифатида ҳам шуҳрат қозониб келаётган эди. 1995 йил фожиали ҳалок бўлган.

***

Куйдиради, бевош, безори,
Юрагимга ботар озори.

Кеча уйга келиб бемаҳал,
Ўзин солди кўзгуга аввал.

Алмаштириб эгни-бошини,
Яна такрор кўзгуга боқиб,
Кийиб кўрди бошқа тусини.

Сўнг яна бир қараб кўзгуга,
Қиёфасин айлади тафтиш.

Кетди.

Мен эса – отаман, унинг отаси
Уйда қолдим ёлғиз,
Уни соғиниб.

***

Бу шоир.
Нималар ҳақда ёзар у?

Ҳаёт ҳақида.
Шеърларида йўқдир ҳеч нарса
Ҳаётдан бошқа.

Бир ўзи
Ҳамманинг диққатин жалб этиб,
Нени ўргатади ҳаммага ?

Ухлаб қолмасликни
Ўзни унутиб.
Бу эса жуда муҳим.

Рус тилидан Нодира Абдуллаева таржимаси