Франческа Жетунда Перейра (Нигерия)

Франческа Жетунда Перейра 1933 йили Лагосда (Нигерия) туғилган. Инглиз тилида ижод қилади.

ҚОП-ҚОРА ОНАМ

Она-замин,
Уйқудасан аллақачон.
Сенинг халқинг –
Табиат фарзанди,
Жонивор,
Ҳайвон.
Севади инчунун,
Ўлдиради кейин,
Еб қўяди яшамоқ учун.

Қалбимизни
Разолатдан қутқариш учун
Бегоналар келди,
Бойлик излашди,
Билим излашди,
Роса талашди.
Сени «Қора» — дедилар,
Бу – рост,
Ростда қорасан.
Ана, холос!
Улар сенга келтирдилар
«Нур»,
Ойдинда турдинг –
Болаларингни кишанда
Ҳобил қамчиси остида
Уқубат йўлида кўрдинг.
Бу сертовозе
“Нур” берган жонлар,
Шакаргуфтор,
Меҳрибонлар
Еримизни тортиб олдилар
Бизни ҳимоя қилар, деб сайлаган
Даҳоларимизни
Арзимас садақага
Сотиб олдилар,
Болаларимизни
Сарқитлар билан боқдилар,
Ширали гўштларни
Ўзлари ейишди.

Қора Она,
Жуда, жудаям қоп-қорасан,
Чинқирдинг ҳар кимга,
Ҳар юракда
Садо берди овозинг:
«Озодлик, озодлик
Фарзандларимга!»
Бизга “нур” келтирганлар
Биздан кетдилар
Гўёки
Ўз хоҳишлари билан
Кетаётгандай,
Вазмин ва сассиз
Қутловлар остида
Сузиб кетишди.

Ай, Қора Она,
Даҳоларинг
“Нур” келтиришни
Ва кишан ясашни
Ўрганиб олгандилар.
Ай, Қора Она,
Юрагинг яра,
Яна чинқирасан:
«О, нажот қайда?
Ҳалок бўлмоқда
Болаларим!»
Дунё
Овозингни эшитмайди ҳеч,
Зеро юрт – мустақил,
Мустамлакамас.
Жовдирар
Қора кўз болаларинг
Ботир, бўз болаларинг.
Энди болаларингни,
Бегона эмас,
Эзмоқда
Ўз болаларинг…