Озарбайжонда тарихий жараён бошланди: бундан қарийб 30 йил аввал оккупация сабаб киндик қони тўкилган ҳудудларни тарк этган аҳоли яна ўз ошёнига қайтмоқда. Бу ҳақда AZƏRTAC ахборот агентлиги хабар берди. Мамлакат президенти Илҳом Алиев ўз чиқишларидан бирида бу жараённи “Буюк қайтиш” деб атаган.

Айни кунларда Зангилан туманидаги Ағали қишлоғига оилаларни кўчириш давом этмоқда. “Ақлли қишлоқ” (smart village) концепцияси бўйича барпо этилган ҳудудга 41 оила жойлашиши кўзда тутилган. Бир пайтлар мажбуран ўз уйларини тарк этган аҳолига муқобил энергия манбалари, экологик тоза иситиш ва интеллектуал ёритиш тизимлари билан таъминланган тураржойлар ажратилган. “Ақлли қишлоқ” мактаб, боғча, поликлиника ва бозорга ҳам эга.

Озарбайжон президентининг Зангилан тумани бўйича махсус вакили Воҳид Ҳожиев Қорабоғдаги урушдан кейиноқ ишғолдан озод қилинган ҳудудларда қурилиш-тиклаш ишлари амалга оширила бошлаганини маълум қилган.  Жумладан, Зангиланда ҳам йирик инфраструктура лойиҳалари амалга оширилмоқда. Автомобиль ва темир йўллари қурилмоқда, яқин фурсатда аэропорт фойдаланишга топширилади.

Қонунчиликка кўра, ўз тарихий ҳудудига кўчиб келган аҳоли уч йил давомида давлат томонидан белгиланган ижтимоий ҳимоя имкониятларидан фойдаланади. Ишғолдан озод қилинган ҳудудларга аҳолини кўчириш давом этмоқда.

Эслатиб ўтамиз, Озарбайжон армияси Қорабоғда 2020 йил 27 сентябрдан 9 ноябрга қадар кечган жангларда қарийб 30 йил ишғол остида бўлган ҳудудларини қайтариб олди. 2020 йилнинг 10 ноябрида Озарбайжон, Арманистон ҳамда Россия ўртасида уч томонлама битим имзоланди. 44 кунлик уруш якунида Қорабоғдаги 5 та шаҳар, 4 та посёлка ҳамда 286 та қишлоқ яна Озарбайжон тасарруфига ўтди.

Аввал хабар берганимиздек, 2021 йил ноябрь ойида президент Илҳом Алиев тарихий ғалабага эришиб, Озарбайжон ҳудудларини ишғолдан озод қилгани учун “Туркий дунёнинг Олий ордени” билан тақдирланган эди.