Истеъдодли адиб ва журналист Ражаббой Ота Турк (Раупов) Бухоро вилоятининг Шофиркон туманида туғилган (21.03.1955).Тошкент Давлат университетининг журналистика факултети (1978), М.Горкий номидаги Москва адабиёт институти Олий курсини (1989) тугатган.“Ўзбекистон адабиёти ва санъати”, “Халқ сўзи” “Ишонч” газеталарида бўлим мудири, “Ўзбекистон табиати” ва “Ипак йўли” газеталарининг ташкилотчиси ҳамда Бош муҳаррири вазифасида фаолият кўрсатган.“Юрак садоси” (1981), “Она сўз” (1989), “Нур дарвозаси”, “Эътиқод” (2002), “Устун” (2002-2005) каби насрий китоблари чоп этилган. Унинг “Осмоннинг эгаси”, “Остона”, ва “Она сўз” қиссалари машҳур. “Юракдаги Бухоро” (1998) тўпламининг тузувчиси ва муаллифларидан бири.“Устун” романида академик Ҳ.Абдуллаевнинг долғали ҳаёти тасвирланган. “Хаётимга суиқасд” номли ҳужжатли романи автобиографик характерга эга. Унинг ҳикоя ва қиссалари рус, поляк, грузин тилларида чоп этилган. Рус ёзувчилари, олимлари ёш ўзбек ёзувчиси (80-йиллар) Ражаббой Рауповнинг ҳикоялари насрчиликда миллий ҳодиса экани ҳақида ёздилар…Айни дамда у геология, геофизика, сейсмология, гидрогеология соҳалари билан жиддий шуғулланиб, “Нефт ва газ конлари геологияси ҳамда қидируви институти ОАЖ 50 ёшда” (2009), “Минерал ресурслар институти” ва “Сейсмология институти” (2012) каби китобларни нашр эттирди.