Madxav Prasad Gimir (माधव प्रसाद घिमिरे) – Nepal shoiri. “Rajeshvari” va “Osiy ona” dostonlari unga katta shuhrat keltirgan.
QADRDON TOG‘LAR
Men shunday sevamanki vatanim tog‘larini,
Uning moviy ko‘llari ko‘zgu erur falakka,
Undagi vodiylaru go‘zallikning barini…
Sevdim, samosi esa lojuvard yuksaklik, ha!
Qadrdon tog‘lar… Bunda juda ham serob gullar,
Qumrilar davrasida muhabbat gurunglari,
Nyauli degani-ku unutma deb zorlanar…
Yulduzlar miltillashi… – zavqimga oshno bari!
Do‘stlarim oy nurida baxt haqida kuylashar…
Qadrdon Himolayim! Sen abadiy xilqatsan.
Qalbim qayga yo‘l olsa, ixtiyoringda yashar –
Kamolim va sog‘inchim vatanga muhabbatdan.
Qorli tog‘ tizmalari… ortida mamlakatim…
Gar quyosh yurakda yo‘q – tim qorong‘i tevarak.
Men ko‘ryapman – ana u havorang cho‘qqi qadim
Va yonida bulutlar latif do‘stday jonsarak.
Shunday yaqinki ular, mana, jingalak sochi,
Teginmoqchi bo‘lsang gar – tepaga cho‘z qo‘lingni.
Unda – mening vatanim… mudom hijrondan cho‘chib,
Muhabbatda ko‘rdim men saodatmand yo‘limni.
…Cho‘qqi pinjiga kirdi ko‘kning oppoq buluti,
Xuddi yurak qa’riga yorug‘ qayg‘u kirganday!
Mening ko‘z yoshlarimda qalqidi sevgi o‘ti,
Kamalak jilosidan kengliklar kengayganday.
ShAHID QAHRAMONGA
Biz qo‘lda shamchiroq, qalbda qayg‘u bilan turibmiz,
Biz seni eslaymiz, bahodir. Shaxtingga ofarin joiz!
Qattiq kurashlarda issiq qon oqdi daryo singari, yohu,
Sen qulading, ammo yodingni ona xalqim unutmas mangu.
Biz ishonamiz – g‘alaba barhaq, ozodlikni saqlaymiz,
Biz seni eslaymiz, bahodir. Shaxtingga ofarin joiz!
Biz ovloqda zorlanardik, motamsaro kayfiyatda,
Eplardik qismat haddin chidab, o‘tinib aziyatga.
Sen esa ayovsiz jangga kirding asriy dardga cho‘kmay tiz,
Biz seni eslaymiz, bahodir. Shaxtingga ofarin joiz!
Sen tog‘da otryadni jangga chorlabsan, biz eshitmadik,
Ko‘chamizdan o‘tibsan, bizni uyimizga tiqqandi hadik.
Sen joningni biz uchun berding, barham topar manfur urush,
Hozir bizga qanday og‘ir – yuraklarda hasrat bilan turish!
Vatan mahzun ingraganda sen uyda jim o‘tirolmading,
Og‘alar qanday halok bo‘lishiga aslo chiday olmading.
Sen tushunding – yangi hayot qurish bo‘lmas zinhor qurbonsiz,
Biz seni eslaymiz, bahodir. Shaxtingga ofarin joiz!
Bayroqlarda shior yonar: “Xalq –o‘zini o‘zi qo‘llaydi!”
Uylarda shamchiroqlar shahid qahramon ruhiga gurillaydi.
Sening kurashingdan ruhlandik, dushmanni mag‘lub etamiz!
Biz seni eslaymiz, bahodir. Shaxtingga ofarin joiz!
Minnatdor avlodlardan poyingda gulchambarlar.
Afsonaviy qahramonlar yonida sen yoshsan bir qadar.
Ular sening yo‘lingdan borar, ibrat bo‘lib qoldirding cho‘ng iz…
Tinch uxla, bizning shahid qahramon! Shaxtingga ofarin joiz!
Rus tilidan Safar Olloyor tarjimasi