Ваагн Каренц – шоир ва таржимон. Ереван педагогика институти ва Москвадаги Олий адабиёт курсида ўқиган. “Ёмғирдан сўнг”, “Лолалар”, “Қордаги излар”, “Кечки йўллар”, “Тоғ этагида” каби шеърий китоблари нашрдан чиққан. Рус ва курд тилларидан адабий таржималар қилган.

СЕНИНГ ИСМИНГ

Оппоқ далаларга ёздим
исмингни,
оппоқ табассумдан ёришди дунё.
Исмингни жамлаган ҳарфлар қувончдан
эриб битганида қор каби гўё,
улар сингиб кетган тупроқ бағридан –
униб чиқди мовий қўнғироқгуллар.

Бутун дала бўйлаб таралди бирдан
қўнғироқгулларнинг жаранги масрур,
ердан бош кўтарди бошоқлар бир-бир,
қаддини ростлади саркаш ва мағрур…

Ваҳший қояларга ёздим исмингни,
Қоялар бир зумда айланди кўҳна
ибодатхонанинг деворларига!

* * *

Бепоён далада ястаниб олиб,
Кўкни, булутларни жим кузатарман.
Атрофда сукунат,
Осойишталик.
Гўёки хаёлга чўмган осмон ҳам,
Гўё орзуларга берилган шу дам.
Худдики, бу мовий маъво остида
Буткул гулистонга айланган олам.

Бепоён далада ястаниб олиб,
Қадрдон ва чексиз майдонларимда,
Юксакликда, кўкда кўзим илғаган
Қора бир нуқтадан олмай нигоҳим,
Кўрдим, у ложувард кенглик қўйнида
Булутлар тоқида бургут парвозин.
Кун қиёмга келган паллада
Бургут пастга бўйлар,
Мен эса кўкка.

Самода айланар бургут,
Парвози боқийлик кўшкидан дарак.
Унинг парвоздаги руҳи-жонига
Кўнглимдаги ришталар уланар бешак.
Бургут пастга бўйлар,
Мен эса кўкка.
У ненидир излар, излар бетиним.
Нимадир, нимадир боғлайди бизни,
Балки у оғамдир ва ёки иним.

Рус тилидан Нодира Абдуллаева таржимаси