Жорж Салим замонавий Сурия ҳикоянавислиги тараққиётида муносиб ўрин эгаллаган машҳур ёзувчи. Адиб 1933 йилда Суриянинг Ҳалаб шаҳрида таваллуд топган. Ж.Салим болагигидан илмга чанқоқ, тиришқоқ, иқтидорли, адабиётга ёшлигидан қизиқиши кучли бўлган. Ёзувчи кўп йиллар давомида Дамашқ университетида ўқитувчилик қилган, Маданият вазирлигида ишлаган. Шунингдек Жорж Салим дастлаб Сурия Ёзувчилар уюшмаси, кейинчалик Араб Ёзувчилари уюшмасининг ташкилотчиси ва раҳбарларидан бири ҳисобланади.
Ж.Салим “Қувғинда”(1962) романи, “Бечора одамлар” (1968), “Кетиш” (1970), “Карлар суҳбати” (1973), “Қадимги ташналик ҳикояси”(1976), “Чексиз кенгликдаги ёлғиз товуш” (1976) номли ҳикоялар тўплами билан шуҳрат қозонган.
Ж.Салим адабиёт тарихига оид дарсликлар ёзиш, бадиий асарларни таржима қилиш билан ҳам шуғулланган. Унинг “Араб адабиётига шарҳлар”, “Араб адабиётига оид дарсликлар”, “Ҳикоячилик саргузашти” каби дарсликлари, француз тилидан араб тилига таржима қилган ўн битта ғарб адабиётига оид китоблари мавжуд. Адибнинг араб адабиёти тарихига оид китобларининг ҳар бири ўзининг бой ва қимматли манбалари, сермазмун таҳлиллари билан аҳамиятга молик асарлар ҳисобланади.
Жорж Салим 1976 йилда вафот этган. Унинг кўплаб ижод намуналари вафотидан сўнг қайта нашр қилинган.