Турк ёзувчиси, турк адабиётида реализм оқимининг йирик вакилларидан. Дастлабки романи «Дабдаба» (1888)да олий табақа вакилларининг ахлоқий тубанлиги фош этилган, Истанбул ҳаётининг реал манзаралари тасвирланган. «Кўзгу ёхуд шукуҳ» (1888), «Иффат» (1896), «Мураббия» (1898), «Севгида тенглик» (1899) романларида турк жамиятининг деярли ярим асрлик хаёти акс этади.Гурпинар «Севги изларидан» (1910) ҳамда «Думли юлдуз остидаги учрашув» (1918) романларида оила, ахлоқ масалаларига мурожаат қилган. 2-жаҳон уруши давридаги турк жамиятининг чуқур ижтимоий зиддиятлари «Эшитилмаган бир воқеа» (1919) романида, турк аёлларининг аянчли аҳволи эса «Биллур қалб», «Боғланган кўнгиллар» (1926) романларида ўз ифодасини топган.«Муҳаббат тилсими» (1928), «Уятсиз одам» (1934) каби романларида киборлар жамиятининг нуқсонлари очиб ташланган. Гурпинарнинг «Хотинлар воизи» (1918), «Номус ва очлик масалалари» (1933), «Ерости йўлининг икки тешиги» (1934), «Менга фаришта бўлиб кўринган иблис» (1943) каби ҳикоялар тўпламлари, «Куз булбули» (1912) песаси ҳам бор.