Даниель Дефо (тахминан 1660, Криплгейт — 1731.26.4, Мурфилдс) — инглиз ёзувчиси, публицист, реалистик наср асосчиларидан бири. Ижодий фаолиятини журналист сифатида бошлаган.
«Лойиҳалар тўғрисида тажрибалар» (1697) памфлетида бир қатор сиёсий ва иқтисодий ислоҳотлар ўтказишни таклиф этган. Кўпгина асарларида тадбиркорлик, ақл-идрок, эътиқод ва сўз эркинлигини ёқлаган, демократия ғояларини илгари сурган («Хокисор одамнинг тавсияномаси», 1698 ва б.).
Дефо мақтанчоқ аслзодаларни фош этади («Аслзода инглиз», 1701). 1702 йилда пинҳоний ном билан «Диссентерлардан қасос олишнинг энг осон йўли» номли памфлетини эълон қилгани учун қамалади.
Дефонинг «Робинзон Крузонинг ҳаёти, ажойиб ва ғаройиб саргузаштлари» (1719) романи унга оламшумул шуҳрат келтиради. «Капитан Синглтон» (1720), «Полковник Жак тарихи», «Молл Флендерс» (1722), «Роксана» (1724) саргузашт романлари ҳам қизиқарли тафсилотларга бой. Жаҳон адабиётида «Робинзон Крузо» романига тақлидан жуда кўп асарлар яратилган. Бу роман Йўлдош Шамшаров таржимасида ўзбек тилида бир неча бор нашр этилган.