Frankfurt-Mayn shahrida yahudiylar xonadonida dunyoga kelgan Annali Mari Frankning dadasi Otto Frank tadbirkorlik bilan shug‘ullangan. Onasi Edit Hollander ham o‘ziga to‘q, ziyoli oiladan. Annali oilada kenja farzand edi. U hali 4-5 yashar bola ekanligida fashistlar harakati avjga chiqib, Franklar oilasi yahudiylarga nisbatan siyosiy siquvlar tufayli Niderlandiyaga qochib ketishga majbur bo‘ladi. Otto Frank bu yerda ham tadbirkorlik faoliyatini davom ettiradi. Ammo fashistlar Gollandiyaga bostirib kirgach, yahudiylar yana mushkul ahvolda qoladi. Annalining opasi Margo Betti Frank mehnat lageriga chaqiriladi. Franklar oilasi bu xabardan so‘ng shoshilinch ravishda 1942 yilning 16 iyul kuni Amsterdam markazidagi bir bino chordog‘iga yashirinishadi. Ularga Van Pelslar oilasi hamrohlik qiladi. Otto Frankning hamkasblari iqtisodiy, moliyaviy va ma’naviy yordam berib turishadi.
Chordoqdagi ikki yillik yashirin hayoti davomida Anna Frank kundalik yozib boradi. Aslida yashirinishdan biroz oldinroq qog‘ozga tusha boshlagan kundalik “Chordoq hikoyalari” nomi bilan davom ettiriladi. Kundalikda Annaning kechinmalari, qo‘rquvlari va urushdan norozilik kayfiyati yaqqol aks etib turadi.
Bu hujjatli asarda urush tafsilotlariga nisbatan otalar va bolalar muammosi, ruhiy iztiroblarga ko‘proq ahamiyat berilgan. “Chordoq hikoyalari” aniq hayotiy kuzatuv asosida, badiiy to‘qimalarsiz yozilgan bo‘lib, his-tuyg‘ularga boy. Anna Frank voqelik haqida xolis fikr yuritishga urinadi.
Urush oxirlab, qochqinlikdagi kunlariga barham berilgach, Anna kundaligini roman sifatida chop etishni rejalashtirib, 1944 yilning 20 mayidan yozuvlarini qayta ko‘rib chiqa boshlaydi. Afsuski, uni kitob holida o‘zi ko‘rmaydi. A.Frank 1945 yili fevral oyida fashistlarning Bergen shahri yaqinidagi kontsentratsion lagerida olamdan o‘tadi. Yozganlari “Chordoq hikoyalari” nomi bilan ilk bor 1947 yilda nashr etiladi va 1952 yilga kelib, Yevropa qit’asida dovruq qozonadi. Ushbu asar tufayli butun dunyo Anna Frankni taniydi. Kitob oltmishdan ortiq tilga tarjima qilinadi. Bu asar hozirda dunyoning ko‘plab mamlakatlarida adabiyot darsliklari orqali o‘quvchilarga tanishtiriladi.