Франкфурт-Майн шаҳрида яҳудийлар хонадонида дунёга келган Аннали Мари Франкнинг дадаси Отто Франк тадбиркорлик билан шуғулланган. Онаси Эдит Ҳолландер ҳам ўзига тўқ, зиёли оиладан. Аннали оилада кенжа фарзанд эди. У ҳали 4-5 яшар бола эканлигида фашистлар ҳаракати авжга чиқиб, Франклар оиласи яҳудийларга нисбатан сиёсий сиқувлар туфайли Нидерландияга қочиб кетишга мажбур бўлади. Отто Франк бу ерда ҳам тадбиркорлик фаолиятини давом эттиради. Аммо фашистлар Голландияга бостириб киргач, яҳудийлар яна мушкул аҳволда қолади. Анналининг опаси Марго Бетти Франк меҳнат лагерига чақирилади. Франклар оиласи бу хабардан сўнг шошилинч равишда 1942 йилнинг 16 июль куни Амстердам марказидаги бир бино чордоғига яширинишади. Уларга Ван Пельслар оиласи ҳамроҳлик қилади. Отто Франкнинг ҳамкасблари иқтисодий, молиявий ва маънавий ёрдам бериб туришади.
Чордоқдаги икки йиллик яширин ҳаёти давомида Анна Франк кундалик ёзиб боради. Аслида яширинишдан бироз олдинроқ қоғозга туша бошлаган кундалик “Чордоқ ҳикоялари” номи билан давом эттирилади. Кундаликда Аннанинг кечинмалари, қўрқувлари ва урушдан норозилик кайфияти яққол акс этиб туради.
Бу ҳужжатли асарда уруш тафсилотларига нисбатан оталар ва болалар муаммоси, руҳий изтиробларга кўпроқ аҳамият берилган. “Чордоқ ҳикоялари” аниқ ҳаётий кузатув асосида, бадиий тўқималарсиз ёзилган бўлиб, ҳис-туйғуларга бой. Анна Франк воқелик ҳақида холис фикр юритишга уринади.
Уруш охирлаб, қочқинликдаги кунларига барҳам берилгач, Анна кундалигини роман сифатида чоп этишни режалаштириб, 1944 йилнинг 20 майидан ёзувларини қайта кўриб чиқа бошлайди. Афсуски, уни китоб ҳолида ўзи кўрмайди. А.Франк 1945 йили февраль ойида фашистларнинг Берген шаҳри яқинидаги концентрацион лагерида оламдан ўтади. Ёзганлари “Чордоқ ҳикоялари” номи билан илк бор 1947 йилда нашр этилади ва 1952 йилга келиб, Европа қитъасида довруқ қозонади. Ушбу асар туфайли бутун дунё Анна Франкни танийди. Китоб олтмишдан ортиқ тилга таржима қилинади. Бу асар ҳозирда дунёнинг кўплаб мамлакатларида адабиёт дарсликлари орқали ўқувчиларга таништирилади.