Сувўлчагичлар нега чўкиб кетмайди?

Кўпчилигимиз дарё ҳамда кўллар сатҳида бу ҳашаротларнинг сирпанчиқ муз устида конькичилардек учаётгани ва чўкиб кетмаётганини кўрганмиз.

Уларнинг сув устида бемалол югуришига нима ёрдам беради? Сувўлчагич деб аталадиган бу ҳашаротларга эътибор билан қаралса, уларнинг узун оёқлари учида обдан ёғ суртилган тукли ёстиқ борлигини кўрамиз. У оёғига бошмоқ кийиб олгандек таассурот уйғотади кишида. Сувўлчагичнинг қоринчаси ҳам мумсимон моддага тўйинган туклар билан қопланган, ана шунинг шарофати ўлароқ танаси намланмайди ва улар сув устида бемалол югуради ҳамда чўкмайди.

Уларнинг оёғи олтита, олд оёқлари кейинги ва ўртадаги оёқларидан кўра калтароқ. Орқа ва ўрта оёқлари ҳаракатланиши учун хизмат қилса, ўткир тирноқли олд оёқлари билан сувўлчагич сувга тушган ҳашаротлар — пашша ва чивинларни тутган заҳоти ўткир тирноқларини тиқиб олади.

Сувўлчагич шу тариқа сувда яшайди ва шу ерда овқатланади. Ҳашаротларнинг дарё ва кўллар сатҳида, гуё уларнинг масофасини ўлчаётгандек чопиб юришига ишора этилиб, улар сувўлчагичлар, деб аталган.