Қулоқтешардан чўчиш керакми?

Катта ёшдаги одамларда негадир мутлақо зарарсиз бу ҳашаротга нисбатан совуқ муносабат шаклланган. Ҳатто унга қулоқтешар деган ғалати ном ҳам беришган. Бу ҳашарот пир-пир айланиб ва чапдастлик қилиб, ухлаётган одамнинг қулоғига, кейин миясига кириб кетармиш. Қулоқтешарга нисбатан бундай муносабатнинг шаклланишига, бизнингча, унинг хунук ва қўпол қиёфаси сабаб бўлган кўринади. Унинг танаси узун, иккита жажжи қаноти ва ортида иккита чангали бор. Қулоқтешар ҳам ўрмалайди, ҳам уча олади. Унинг учиши ҳам ғайритабиий: пастлаб ва деярли тик ҳолатда учади.

Аслини айтганда, қулоқтешарлар мутлақо беозор ҳашарот, у ҳеч қачон ухлаётган одамнинг қулоғига кирмайди ва чақмайди. У тухум қўйиб, насл кутаётган пайти қўл билан тегилса, қаттиқ қисқичлари билан енгилгина чимчилаб олиши мумкин. Қулоқтешарлар нақадар ғамхўр, болаларини бир лаҳза бўлсин, холи қолдирмайди. Бордию қулоқтешарларни ҳайдамоқчи бўлсангиз, улар асабийлашади ва қаршилик кўрсатади, иложсиз қолса, тухумларини жағи билан йиғиштириб олиб, бошқа хавфсизроқ жойга кўчиради.

Қулоқтешар зурёдларини тухумдан чиққандан кейин ҳам ардоқлаб асрашда давом этади. Улар ҳар томонга ўрмалашга интилаётган ўз болаларини — оппоқ жажжи личинкаларини жуда яхши кўради. Аммо она уларнинг бу ҳаракатини тийиб қўяди ва дарров ортига қайтаради.