Балиқ овига кетаётган болакай пўкакдан ясалган сузгичи нима учун сувга чўкиб кетмаслигини уйлаб ўтирмайди. Аммо пўкакнинг сувга чўкмаслик хусусияти қадим замонлардан бери маълум, ундан ясалган қутқариш мосламаларидан эса бундан минг йиллар муқаддам фойдаланилган.

Пўкак сувдан анча енгил. Бунинг сабаби шундаки, сув унинг ҳаво тўла ичига ўта олмайди. Бу пўкакни сувга бўкиб қолиб, чўкиб кетишдан сақлайди.

Пўкак пўкакбоп эман пўстлоғининг ташқи қисмидан тайёрланади. Пўкакларнинг учдан икки қисми пўкакбоп эман ўстириладиган Португалия ва Испанияда ишлаб чиқарилади. Пўкакбоп эманнинг бўйи 6 — 12 метр, йўғонлиги эса 1 метргача боради. Дарахтнинг пўстлоғи илк марта у йигирма яшар бўлганида қириб олинади. Бу дарахтга ҳеч қандай зиён етказмайди, қуритиб қўймайди, аксинча, фойда келтиради.

Тахминан, яна тўққиз йилдан сўнг пўстлоқ қайта қириб олинади. Бу икки марта қирилган пўстлоқдан тайёрланган пўкак дағал ва ғадир-будур бўлади. Кейинчалик ҳар тўққиз йилда пўстлоқ қирилишидан олинадиган пўкак анча сифатли бўлади. Шундай қилиб, бир дарахтдан юз йилга яқин пўкак олинади.

Қириб олинган пўкак бир неча ҳафта қуритилади, сўнгра таркибидан танин кислотасини чиқариб юбориш учун пиширилади. Пиширилган пўкак юпқа ва эгилувчан варақ ҳолида ёйилади, қуритилади ва бошқа мамлакатларга жўнатиш учун тахлаб қўйилади.

Пўкак хом ашёсининг икки тури бор. Улардан бири пўкак дарахти деб аталади. Бу материалдан пўкак, сузгич ва қутқарув жилетлари тайёрлашда фойдаланилади. Пўкак хом ашёсининг бошқа бир тури янчилган пўкак деб аталади. У дастлаб янчилади, сўнгра маълум бир бириктирувчи материаллар билан бирга пиширилади. Бундай материалдан қувурларга қоплама, оёқ кийимларнинг тагчарми тўлдиргичлари, автомобиль прокладкалари, шунингдек, шишаларнинг қопқоғи остидаги тиқинлари тайёрланади.

Биноларни товуш ўтказмайдиган қилиб қуришда, омбор, музлатгич хоналар ва рефрижераторларни изоляциялаш пўкак қўлланадиган соҳадир.