O‘zbekiston terma jamoasi Xalqaro Mendeleev kimyo olimpiadasida o‘nta medalni qo‘lga kiritdi

Toshkentda maktab  o‘quvchilari o‘rtasida o‘tkazilgan 56-Xalqaro Mendeleev kimyo  olimpiadasida O‘zbekiston  terma jamoasi 1 ta  oltin,  4  ta  kumush  va  5  ta  bronza,  jami  10 ta  medalni  qo‘lga  kiritdi,  deb  xabar  berdi  “Dunyo” AA.

Prezident  ta’lim  muassasalari  agentligi  ma’lumotiga  ko‘ra,  poytaxtimizdagi “Yangi O‘zbekiston” majmuasida olimpiada g‘olib va sovrindorlarini taqdirlashga bag‘ishlangan tadbir bo‘lib o‘tdi. Unda navbatdagi xalqaro olimpiadaning O‘zbekistonda  o‘tkazilishi mamlakatimiz tarixida alohida iz  qoldirganini  ta’kidlandi.

Xalqaro  olimpiadaning  10  nafar  ishtirokchisi – rossiyalik    5  nafar  o‘quvchi,  Turkiya,  Isroil,  Belarusdan  bir  nafardan  o‘quvchi  oltin  medalga  munosib  topildi.  Ular  orasida O‘zbekistondan  Prezident  ta’lim  muassasalari  agentligi  tizimidagi  Abu  Ali  ibn  Sino  nomidagi  ixtisoslashtirilgan  maktab  o‘quvchisi Azimjon Jamolov ham  birinchi  o‘ringa  loyiq  topildi.

Olimpiadaning  mutlaq  g‘olibligiga hamda  Rossiya  Fanlar  akademiyasi  akademigi  Valeriy  Lunin  nomidagi  maxsus  pul  mukofotiga  rossiyalik  Ignatiy  Tarabrin  munosib  topildi.

Qayd etilishicha, o‘tgan  bir  hafta  davomida  turli  mamlakatlardan tashrif  buyurgan  100  nafarga  yaqin  iste’dodlar nafaqat o‘zaro kuch sinashishdi, balki bilim  va tajribalarini oshirishib, yangi  do‘stlar orttirishdi, Buyuk ipak yo‘li  chorrahasida joylashgan Toshkent, Samarqanddagi qutlug‘ qadamjolarni  ziyorat  qildilar.