Tashkent City халқаро ишбилармонлик маркази ҳудудида барпо этилаётган 50 қаватли бино нафақат Ўзбекистон, балки Марказий Осиёдаги энг баланд бино бўлиши кутилмоқда. Бу ҳақда 5 июль куни Тошкентда бўлиб ўтган матбуот анжуманида маълум қилинди.
“Tashkent City” халқаро ишбилармонлик марказидаги йирик лойиҳа – 215 метрдан ортиқроқ баландликка эга бино Ўзбекистоннинг “Murad Buildings” ҳамда Туркиянинг “Özgüven” компаниялари томонидан қурилмоқда.
Матбуот анжуманида “Murad Buildings” компанияси асосчиси Мурод Назаров ҳамда “Özgüven” ширкати бошқарув раиси Ўзгур Ўзгувен (Özgür Özgüven) бир ярим гектар майдонни эгаллайдиган иншоот қурилишига доир маълумот берди.
Мурод Назаровнинг таъкидлашича, иншоот лойиҳаси жаҳон меъморчилигининг илғор тажрибасини ўрганган ҳолда ишлаб чиқилди ва бу жараёнда дунёнинг 500 дан ортиқ эксперти иштирок этди.
“Биз қарийб икки йилдан буён катта иштиёқ ва лойиҳани юксак даражада рўёбга чиқариш истаги ила ишлаб келмоқдамиз. Биз “Özgüven” каби ишончли ҳамкор топганимиздан мамнунмиз. Эндиликда катта орзуни амалга ошириш учун биргаликда ҳаракат қилмоқдамиз. Биз шаҳар қалбидан муносиб ўрин эгаллайдиган, унинг қоқ марказида кад ростлайдиган, замонавий ва инновацион меъморчилик ечимларини ўзида мужассам этган иншоот барпо қилмоқдамиз”, – деди Мурод Назаров.
Ўз навбатида, Ўзгур Ўзгувен осмонўпар бино меъморчилик нуқтаи назаридан янгича қарашлар ва ноанъанавий ечимларни ўзида акс эттирганини қайд этди.
“Биз Марказий Осиё ва Буюк ипак йўли юрагида жойлашган ушбу лойиҳада иштирок этаётганимиздан бахтиёрмиз. Биз ўз ноу-хауларимизни қўллашдан ташқари, Туркиянинг йирик университетларидан профессор-ўқитувчиларни ишга таклиф қилдик, кўплаб мутахассислардан маслаҳат олдик. Меъморчилик ва муҳандислик нуқтаи назаридан атрофлича тадқиқот ва лойиҳалаштириш ишлари олиб борилди. Бинонинг қурилиши жараёнида гранитдан кучлироқ бўлган М700 турдаги бетон ишлатилади. Бутун объект учун ишлатиладиган бетондан 5000 та хонадон қуриш мумкин эди. Агар қурилишда ишлатиладиган барча темир анжомлар қўшилса, уларнинг умумий узунлиги 7,5 минг километрни ташкил этади. Бу Tashkent City марказидан Истанбулгача бўлган масофадан ҳам узунроқдир”, – дея тафсилотлар билан бўлишди “Özgüven” ширкати бошқарув раиси.
Туркиялик ишбилармон аждодларининг тарихий ватани – ота юртида амалга оширилаётган бунёдкорлик лойиҳасида қатнашаётганидан мамнун эканини алоҳида таъкидлади. “Буюк ипак йўлидаги баланд минорага байроқ тикдик!” дея ўхшатиш қилди у.
Қайд этилишича, лойиҳа қиймати 150 миллион АҚШ доллари атрофида бўлиб, унга сармоя киритиш борасида Хитой, Жанубий Корея ва БААдан қизиқиш билдирилмоқда.
Осмонўпар бинонинг расмий номи ва лойиҳага доир бошқа тафсилотлар жорий йилнинг 15 августидан сўнг эълон қилинади.
С.Салим