2019 yil 15 may kuni «Hilol-nashr» matbaa nashriyotining majlislar zalida Hujjatul islom Abu Homid G‘azzoliyning «Ey farzand!» hamda Shayx Muhammad Sodiq Muhammad Yusuf rohimahullohning «Qur’on va Sunnatdagi ilmiy mo‘jizalar» kitoblari taqdimoti bo‘lib o‘tdi.

Taqdimotni «Hilol-nashr» matbaa nashriyoti, Islom.uz portali rahbari va ayni paytda “Shayx Muhammad Sodiq Muhammad Yusuf” jome masjidi imom-xatibi Ismoil Muhammad Sodiq ochib, taqdimotga yig‘ilgan barcha mehmonlarni muborak Ramazon oyi va kuni kecha yangi ochilgan “Shayx Muhammad Sodiq Muhammad Yusuf” nomidagi masjid bilan muborakbod etdi va ikki kitobning ahamiyati, mohiyati haqida kirish so‘z qilib, uning ishiga muvaffaqiyat tiladi.

Odinaxon Muhammad Sodiq tarjima qilgan «Ey farzand!» asari haqida «Hazrati Ali» jome masjidi imom-xatibi Salohiddin domla Sharipov ma’ruza qildi. «Risolada musulmon oilada farzand tarbiyasi uchun tavsiya qilingan eng to‘g‘ri yo‘llardan biri bayon qilingan. Shuningdek, har bir tolibi ilm o‘rganishi kerak bo‘lgan ilm turlari belgilab berilgan. Shu bilan birga mudarris o‘zida kasb qilishi zarur bo‘lgan sifatlar aytib o‘tilgan, muallim va shogird orasidagi aloqa qanday bo‘lishi kerakligi ham keng izohlab berilgan».

Suriyalik mashhur muhaddis alloma shayx Muhammad Avvomaning o‘g‘li doktor Muhyiddin Muhammad Avvoma tomonidan «Ey farzand!» asari va uning tarjimonini qutlab so‘z yuritilgan videoroligi ham namoyish qilindi.

Shayx Muhammad Sodiq Muhammad Yusuf rohimahullohning «Qur’on va Sunnatdagi ilmiy mo‘jizalar» asari haqida Toshkent viloyati bosh imom-xatibi Xayrulloh Turmatov ma’ruza qildi.

«Qur’on va Sunnatdagi ilmiy mo‘jizalar» asarining o‘ziga xos jihati, undan Qur’on va Sunnatning ta’rifi, Qur’on va Sunnatdagi ilmiy mo‘jizalar haqida mavzular o‘rin olgan.