«Ал-Қоида» тирик ва у яна янги зарбалар беришга тайёр. Бу гал огоҳлантириш одатдагидан хилоф равишда махсус хизматлардан эмас… Бирлашган Миллатлар Ташкилотидан олинди. Террорчилар фаолиятини кузатиш билан шуғулланган комиссия маърузасига кўра, Усома бин Лодин тарафдорлари портлатгич моддалар ва катта молиявий манбаларга осонлик билан эга бўлишлари мумкинлиги боис ҳам «мисли кўрилмаган янги террорчилик ҳаракатларини» амалга оширишлари мумкин.
Ричард Баррет бошчилигидаги таҳлилчилар гуруҳи эътирофича, “бундай ҳаракатларнинг содир бўлиши аниқ ва фақатгина қачон бўлишига вақтгина ҳакам“. Халқаро ҳамжамият кимёвий, бактериологик ва ядровий қуролларни қўлга киритишга интилаётган гуруҳнинг фаолиятига етарли эътибор бермаяпти. БМТ толиблар режими билан алоқадор 430 шахс ва гуруҳдан иборат рўйхат тузган ва уларнинг қурол-яроғ билан савдо қилишига ҳамда ҳаракатларига тақиқ қўйган. Аммо буларнинг етарли эмаслиги аниқ. Барретнинг сўзларига кўра, «Ал-Қоида» ўта ғайриоддий ҳаракат ва унинг учун ҳеч қанақа чегаранинг ўзи йўқ. Бугун ҳаракатнинг изларини ҳам топиш бундан бир йил илгарига қараганда анча мушкул. Ўшанда ҳаракатнинг аниқ ташкилий тузилмаси ва раҳбарияти бор эди”.
Қўшма Штатларга қарши террорчилик ҳаракатларининг амалга оширилиши мумкинлиги хусусида АҚШ сенатини МРБ директори Портер Госс ҳам ўз вақтида огоҳлантирган. Госс ҳам «фалокатнинг қачон содир бўлишини вақт кўрсатади», деган. Федерал қидирув бюроси директори Роберт Мюллер ҳам худди шундай фикрда ва АҚШ ҳудудида «ҳозирча уйқуда» бўлган ҳаракатларнинг мавжудлигидан хавотир билдирган: «Мен ҳозирча эътибор бера олмаётган ва кўрмаётган ҳолатлардан кўпроқ хавотирдаман», деган у.
Пентагон раҳбари Доналд Рамсфелд ҳам конгрессдаги чиқишида террорчиларнинг бугунги кундаги фаолиятига баҳо бера туриб: «Экстремистлар янги зарбалар бериш учун тайёргарлик кўряпти», дея огоҳлантрган. АҚШ Мудофаа вазири, шунингдек, Шимолий Кореянинг кейинги пайтлардаги баёнотлари хусусида: «Бизнингча, Пхенян кимёвий ва биологик қурол яратиш дастурига ҳам эга», деган.
Булардан ташқари АҚШнинг янги Давлат котиби Кондолиза Райс ҳам экстремистик ҳаракатларни қўллаб-қувватлаётган давлатлар хусусида фикр билдирган. Хусусан, у Суриянинг Ливандаги вазиятни «танглаштираётган» ҳарбий салоҳиятига салбий баҳо берган.