Бешинчи Ислом бирдамлик ўйинлари Туркияда бўлиб ўтади

V Ислом бирдамлик ўйинлари жорий йил 9-18 август кунлари Туркиянинг Коня шаҳрида бўлиб ўтади.  2021 йил 20-29 август кунлари бўлиб ўтиши режалаштирилган халқаро мусобақа дунё мамлакатларидаги COVID-19 пандемияси билан боғлиқ вазият туфайли бошқа муддатга кўчирилган эди.

Бу йил бешинчи бор ўтказиладиган Ислом бирдамлик ўйинларида дунёнинг 57 давлатидан 3000 га яқин спортчи иштирок этиши кутилмоқда.

Тафаккур оламининг улуғ сиймоларидан бири бўлган Жалолиддин Румий яшаб ўтган шаҳарда бўладиган халқаро беллашувларга қуръа ташлаш маросими жорий йил 3 июлда бўлиб ўтади.

Ислом бирдамлик спорт федерацияси (ISSF) ҳамкорлик ташкилий қўмитаси халқаро мусобақа доирасида 21 спорт турининг 24 йўналиши бўйича беллашувлар ўтказилишини маълум қилди. Улар орасида енгил атлетика, баскетбол (3х3), велосипед пойгаси, трек велосипеди, қиличбозлик, футбол, кураш, оғир атлетика, гандбол, гимнастика, акробатик гимнастика, бадиий гимнастика, дзюдо, каратэ, кикбоксинг, стол тенниси, камондан отиш, таэквондо, волейбол, сузиш каби спорт турлари бор. Бундан ташқари, дастурдан енгил атлетика, дзюдо, сузиш ва оғир атлетика каби ногиронлар учун мусобақалар ҳам ўрин олган.

Коняда бўлиб ўтадиган баҳсларда бошқа давлатлар қатори Ўзбекистон спортчиларининг ҳам муносиб иштирок этиши кутилмоқда. Бу борада Ўзбекистон спортни ривожлантириш вазирлиги, Миллий олимпия қўмитаси ҳамда спорт федерациялари ҳамкорлигида тайёргарлик дастури ишлаб чиқилган ҳамда ўқув-йиғин машғулотларининг режаси тасдиқланган.

Ўзбекистон спортни ривожлантириш вазирлиги маълумотига кўра, V Ислом бирдамлик ўйинларида мамлакат делегацияси 23 спорт йўналиши бўйича 270 га яқин спортчи билан қатнашиши режалаштирилмоқда. Бўлажак ўйинларда Ўзбекистоннинг гандбол ва  баскетбол (3х3) аёллар жамоаларининг медаллар учун кураш олиб бориши кутилмоқда.

Илк Ислом бирдамлик ўйинлари 2005 йил 8-20 апрель кунлари Саудия Арабистонининг Макка шаҳрида ташкил этилган бўлиб, унда 55 давлатдан 6000 га яқин спортчи иштирок этган. 2010 йилда Эронда ўтказилиши режалаштирилган иккинчи ўйинлар келишмовчиликлар туфайли бекор қилинди. Учинчи Ислом бирдамлик ўйинлари 2013 йил Индонезияда, тўртинчи ўйинлар эса 2017 йил Бокуда ўтказилди.