Эшқобил Шукур. Ватан бу (видео)

ВАТАН БУ

Момолар сирларин тинглаган тупроқ,
Боболар кўкрагин кўтарган осмон.
Пирларнинг кафтида кўкарган байроқ,
Оналар кўзида йиғлаган достон.
Ватан бу!
Ватан бу!
Ватан бу!

Ўғиллар кўксида чақнаган чақмоқ,
Ойқизлар кўнглини гуллатган туйғу.
Гўдаклар дилидан бошланган ирмоқ,
Шоирлар юрагин порлатган қайғу.
Ватан бу!
Ватан бу!
Ватан бу!

Даҳолар манглайин ярқиратган ой,
Фидолар бағридан силқиган бардош.
Тангри ер юзига йўллаган ҳумой,
Боботоғ бағрида туғилган қуёш.
Ватан бу!
Ватан бу!
Ватан бу!

Эшқобил Шукур