Таниқли адиб, моҳир таржимон Мирзакалон Исмоилий 1908 йили Қирғизистоннинг Ўш шаҳрида дунёга келган. 1928—1930 йилларда Ўрта Осиё Давлат университетининг Шарқ факультетида ўқиб, ўқитувчилик қилган.Тошкент киностудияси, Ўзбекистон Ёзувчилар уюшмаси, «Қизил Ўзбекистон», «Шарқ юлдузи» муҳарририятларида ҳамда Ўзбекистон Давлат нашриётида хизмат қилган. У рус адабиёти намоёндаларидан М. Ю. Лермонтов, Л. Н. Толстой, А. П. Чехов, М. Горький, М. А. Шолохов асарларини ҳамда жаҳон адабиёти намуналаридан кўпларини ўзбек тилига ўгирди. Адиб урушдан кейинги йилларда яратилган «Фарғона тонг отгунча» (1958, 1967) трилогиясида Октябрь тўнтарилиши арафасидаги ўзбек меҳнаткашларининг оғир ҳаёти ва маърифат сари интилишини тасвирлади. М. Исмоилий «Бизнинг роман» (1963) ида ёшлар ҳаётини акс эттирувчи, «Одамийлик қиссаси» (1965) каби маънавият ёғдуларини шарафловчи пухта, гўзал насрий асарлари билан ўзбек адабиётини юксалтиришга ўз улушини қўшди. У 1986 йилда вафот этган.