Dadaxon Nuriy. Yadro bombasi bizga kerakmi? (“Vijdon hayqiriqlari” nomli triptix-romanning ikkinchi qismi). Toshkent, 2018

“1966–1979 yillar orasida O‘zbekiston hududida Moskva tomonidan o‘ta yashirin suratda to‘rt marotaba yadro portlashlari amalga oshirilgan. Bular bizga oshkor bo‘lgani xolos.
Bunday o‘ta mudhish, jinoyatkorona qilmishlarning yana qancha-qanchasidan hamon ko‘pchilik bexabar”.
“Ogonyok” jurnali, №23. 2010 y.
Moskva.

DEBOChA

Qo‘shnimiz Qozog‘istonda amalga oshirilgan atom bombasi sinovi – “Semipalatinsk fojiasi” nomi bilan fosh etilib, jahon jamoatchiligi tomonidan mintaqamiz aholisi, tabiat olamiga qilingan vahshiyona tajovuz – genotsid deb, baholangani sir emas. U hamon o‘z asoratini namoyon etib turibdi.
“O‘zbekistonda … Xirosimadan keyin yadro bombasi portlatilganmi?!”… Eshitgan quloqqa ancha noxush chalinuvchi bu savolga javob izlab, ko‘pdan beri xayolim faromush edi.
Bahorning tarovatbaxsh yomg‘irli oqshomlaridan birida tasodifiy voqea ro‘y berdi-yu, yaqin “o‘tmish”ning ma’lum va noma’lum so‘qmoqlari bo‘ylab kezib chiqishimga to‘g‘ri keldi.