Дакоцу Иида (飯田蛇笏) — япон шоири. 1885 йили Яманаси префектурасида туғилган. Васэда университети адабиёт факультетида ўқиган.

БАҲОР

* * *

Баҳорнинг айни авжи.
Тоғдаги ибодатгоҳ дарвозаси устидан
Сузиб ўтаётир оппоқ булутлар…

КУЗ

* * *

Чириллоқни ушладиму кўзига боқдим
Ва ўша он англадим —
Куз келаётир…

* * *

Куз юлдузлари —
Тоғ чўққиси устида
Чарақлайди мовий-яшил нур…

* * *

Инсон юраги…
Сен унга жуда ўхшайсан —
Кузги ёнарқурт.

* * *

Шудринг порлайди таро япроқларида.
Олисдаги тоғларнинг
Шамойили бунчалар тиниқ…

ҚИШ

* * *

Қировли қиш ўрмони.
Уйқусираган қуёш нурлари
Ўрмалайди дарахтларнинг учига.

* * *

Ўлими яқин бемор,
Финжонни ушлаб олиб,
Гўзал тирноқларига тикилиб тўймас…

* * *

Ўчоқ шуъласи тушган
Унинг юзи ғамсиз ва гўзал —
Гарчи ўлим турар ёнма-ён.

Хуршид Даврон таржимаси

***

Печкада ўтин ёнар,
Ойна орти – совуқ денгиз узра
Чийиллайди чайкалар…

***

Печка эшигин очдим,
Охиста, истамайгина
Ёнади кўмир…

***

Шамолда чайқалиб жаранглар
Эшигимга осилган қўнғироқ
Анор гуллабди…

***

Пашшахонага кириб ётибман,
Сўнаётир кузги саҳарда
Ўчоқдаги кечаги чўғлар…

***

Намиқиб бўкди теваракдаги,
Қувраб қолган кузги майсалар.
Ёмғир қуяр тоғларни ювиб

***

Эсар ғарбий шамоллар,
Кириб келар ёмғир сувлари,
Остонага қадар ўрмалаб.

***

Инсон қалбига ўхшар
Фақат бир нарса –
Кузги ёнар қурт…

***

Қор кўмиб ташлади
Барча йўлларни
Исинаман ўчоқда ёлғиз…

Холдор Вулқон таржимаси