Shoir va yozuvchi Arjumand Behzod Lov (Ercüment Behzat Lav) 1903 yili Istanbulda tug‘ilgan. Germaniyadagi Shtern konservatoriyasi va Raynxart teatr akademiyasida ta’lim olgan. Istanbul tetrida aktyorlik va rejissyorlik (1935-1947), davlat konservatoriyasida o‘qituvchilik (1951-1961) qilgan. Bir muddat jurnalistlik, radioda boshlovchilik qilgan. “Bir millat uyg‘onur”, “Karim meni aldatsa” filmlarida rol ijro etgan.
“S.O.S.” (1931), “Xaos” (1934), “Ochil qulfim, ochil” (1940), “Mau Mau” (1962), “Uch Onado‘li” (1964) kabi kitoblari chop etilgan.

O‘LIKLAR BIR-BIRINING USTIDA

Yashamak tuyg‘usidan ustun,
Yo‘q bo‘lish istagi biz bilan,
Seskanmaymiz endi,
O‘liklar-la quchoqlashib yotishdan.

O‘liklar bir-birining ustida
O‘liklar bir ombor to‘la.
O‘liklarning semizi topilmas,
O‘liklar quruq, qotgan.

Yomg‘ir yog‘ib chiritadi,
Oftob o‘tib quritadi.
Bu yerda o‘lish osonmas,
Jon o‘lishni unutadi.

Oy chiqar o‘liklarning ustiga,
Boqar och mozor qurti misol
Do‘st jon berayotgan do‘stiga.

EHROMNING TUBI

Biz ehromning tubidamiz,
Siz tepada, biz pastda.
Yashash sizniki bo‘lsin.
Malaklar-la bir joyda (qatda).

Zafar ham sog‘inganlarga yoqar
Jonni etarkan fido,
Engilmas maslakning tugamas kuni,
Biz to‘yolmagan dunyoda.

TAMG‘A

Belimizda og‘alarping tamg‘asi.
Ismimiz mag‘aza*larning firmasi
Ularga dunyo ne’matlari,
bizga kon quduqlari,
botqoqlik bezgagi.
_________
* Magaza – magazin.

MENI OPPOQ XONIMNING YoNIGA KO‘MING

Oppoq xonim menga boqdi,
Men ham boqdim,
Kel, dedi oppoq xonim,
Ketdim,
Oppoq xonim meni sevdi,
Men ham sevdim.
Buni oppoq og‘amiz ko‘rdi,
Oppoq xonimni o‘ldirdi,
Men ham oppoq og‘ani o‘ldirdim.
Endi meni osadilar,
Jonim Mog‘ona, ko‘zim Mog‘ona,
Meni oppoq xonimning yoniga ko‘mgil.

Rauf Parfi tarjimalari