* * *

Eslaysanmi,
qovoq gullarini…
Qamishlarga o‘rlagan?..

* * *

Yana qadim quduqdan
suv tortayotir ona
O, mening jarangdor xotiram!

* * *

Qorbo‘ron yanvarda
Va yana ketmoqda ota
xotiraning yo‘lakchasida…

* * *

Kuylayotgan ovoz kimniki ajab?
Shu qadar tanish,
mening hayotim uzra…

* * *

Titragan kaftimda
buloq ko‘z ochdi.
Va men ko‘rdim ajdodlarimni…

* * *

Kuzgi izg‘irin.
Qo‘lda piyola
Kaftda isitilgan.

* * *

Xonqizi
iyunning kaftida
O, tangrim, tangrim!..

* * *

Keksaygan kaftimni isitayapman
bolalikning kaftdekkina gulxanida.
O, mening kaftlarim!..

* * *

Betinim titraydi gulmohi
qaynoq qo‘limda!
O, yoshlik – umrim bahori!

* * *

Har tongda
Mo‘y qalam qo‘limda
Abadiyat oldidagi burch.

* * *

Parvoz qilgan turnalar
Ortga boqmoq istaydi:
Vatan qoldi-da ortda.

* * *

Biz bor edik u yerda,
Nayson ranglari aro.
Biz ichgandik u yerda…

* * *

Bahorning so‘nggi kuni
Yomg‘ir yog‘ar erinmay.
Soyabonsiz kezaman.

* * *

Oh, qani edi,
chiza olsam…
Kuzgi dala hidi!..

* * *

Kuzning bo‘g‘iq havosida
inja bir ovozni tuyaman.
Eh, bu mening yoshligim emasmi?!

* * *

Bahor haqli edi.
Men esa unga achinaman.
Bahor haqli edi…

* * *

Biz bulutmiz
bahor va qishlar uzra.
Biz bulutmiz…

* * *

Omoni* degan so‘zda
uch bo‘g‘in bor o‘lchovsiz.
Biri kechikkan saboq.

* * *

Bir marta qanot qoq
Jazirama oldidan.
Satkat* eskiga yangi yamoq.

* * *

Derazadan ingan nur
Onalarning nigohi.
Ondol* — bolalik…

* * *

Bu bulutlar ostida
Biz hammamiz barobar –
Men va kermek* sukutda…
______
* Omoni — ona.
* Satkat — qamish qalpoq.
* Ondol — isitiladigan pol.
* Kermek — egat.

Rus tilidan Ma’rufjon Yo‘ldoshev tarjimasi