Арнолд Саувен (1857-1938)

Арнолд Саувен (Arnold Sauwen) — фламанд шоири. Нидерланд тилида ижод қилган. Импрессионизмнинг кейинги шоирлари қаторида бўлган. Бу авлод шоирлари (Саувен, Лангендонк, Карел ван де Вустейне) шаҳар шовқинидан узоқда ҳаловат ва ҳузур топган. Саувеннинг энг яхши шеърлари Лимбург вилоятининг табиатидан завқланиб ёзилган.

ТРАКТИР

Туб аҳоли сингари неча йиллардан буён
Савдо йўллари аро ўзинг муқим турибсан.
Қанча-қанча одамни этгансан ахир меҳмон,
Бошпанаю егулик, яна шиша берибсан.
Оқшом чоғи мажолсиз алаҳлаганда биров,
Ҳар битта томирида сезганда чексиз чарчоқ,
Деразангдан тушган нур кўринар мисли олов,
Олисдаги дўст каби очиб турасан қучоқ.
Йўлида ўз истагу ниятлари уйига
Кирган қанчалар бахтли – қайғу келмас ўйига,
Ўша уйда эшитар мулойим сўз, саломни,
Меҳр кутади уни, тотар ширин таомни.
Каминдаги олов ҳам ёнар қувониб яна,
Чойшаб янги ёзилган, бунда иссиқдир хона.

ОЛИСДА

Яна кўраяпман: баланд иморат,
Яшил деразалар, бурмали парда.
Иккита арава турар ҳовлида,
Қизил сопол томда бўёқ бетоқат.
Вақтнинг ўлдиргани мендадир, мана,
Худди аввалгидек – панада зулмат,
Омбор тиргакларда турар бақувват,
Дарвоза устуни, қўра, отхона.
Кўп аввал йўқолган ҳой уй, ҳой олам,
Мен билан яшайсан нима бўлса ҳам,
Қалбдаги соғинчу меҳрни ёйиб,
Унутмам мен ўша ширин хотирни:
Мени, у вақтлар ҳали ўсмирни,
Сочи оқ бир аёл чорларди койиб.

Рус тилидан Комила Носирова таржимаси