Раҳимиддин Зоҳарий (Rahimidin Zahari) – малайзиялик шоир. 2003 йили Малайзия фанлар университетини тамомлаган, ушбу даргоҳнинг адабий ижод дастурида иштирок этган. Шеърлардан ташқари пьеса ва новеллалар ҳам ёзади. “Рубоб шивири” пьесаси Куала-Лумпурдаги “Маданият саройи”да саҳналаштирилган. Ҳозирда “Саҳна” театр журнали муҳаррири.

ҚАБРИСТОНДА

Сукунат.
Фақатгина шамол
Ёвшангулларни
Шилдиратади,
Гоҳида самбиттол барги
Шитирлаб қулайди заминга.

Тез-тез келиб тургин: мен
Музлаган ерни истаётган
Қадамларингни сезаман,
Тиловат қилаётган оятларинг
Овозини эшитишни истайман.

Ҳали қачондир сен ҳам бу жойга келасан,
Учрашамиз,
Кейин ажралмаймиз абадий.

ТУПРОҚ МАЙСАСИ

Мен атиргул ғунчаси эмасман,
бош кўтараётган илон ҳам эмасман,.
Мен – тупроқда ўсаётган майсаман,
атиргуллар ҳиди
ва илонлар вишиллаши аро ўсаётган бир кўкат.
Атиргул ҳиди
илон вишиллашини босиб кетаётирми
ёки илон вишиллаши
боғдаги атиргул ҳидини босмоқда,
бу муҳим эмас.

Мен фақат шуни биламан,
Заминдаги майсаман мен.
Менга томган шабнам томчисида
нурлар жилваланмоқда.
Юқорида – само.
Пастда – музлаган,
Қурт-қумурсқалар ковлаб ғовлаган тупроқ.
Мен ўсаётирман
саксовул соясида,
ҳозирча…

“ЭПИГОН” ТУРКУМИДАН

Мен шоир эмас, ўғриман.
Шеърий сатрларни ниқоб қилиб, панасига беркинаман,
эскирган қочиримлар ва қийшайган ҳарфлар
ортига яширинаман.

Мен шоир эмасман, бир қўрқоқман,
фикрлар тумани босган шубҳаларга тўламан…

Ниҳоят, йиртаман бугун шу ўғирланган ниқобни.

Инглиз тилидан Карим Баҳриев таржимаси