Bonifasio Birne (Bonifacio Byrne) – Kuba shoiri.

UXLAYoTGAN QUL

Barcha quvonchlardan mahrum sarkash qul,
Kiygani, yegani chaladir uning.
Ertadan-kechgacha bilmaydi tinim
Faqat ilinjida zumlik uyquning.

U qahr-g‘azabni ichiga yutgan,
Ko‘nikib qolgandir xokisorlikka.
Butunlay unutgan bolaligini
Xo‘jasi yuziga boqolmas tikka.

U uxlar. Shovqin-la o‘tmang yonidan,
Sho‘rlikka ne foyda uyg‘onganidan —
Hech narsa sololmas qalbiga shodlik!

Oromini buzmang, uyg‘otmang aslo,
Ehtimol sho‘rlikning ayni shu asno
Tushiga kirmoqda erku ozodlik!

Fayzi Shohismoil tarjimasi.