Ispaniya mumtoz adabiyotining taniqli namoyandalaridan biri bo‘lgan Pedro Antonio de Alarkon (Pedro Antonio de Alarcón y Ariza) Andaluziya viloyatining Guadisa shaharchasida qashshoqlashgan qadimgi zodagonlar oilasida dunyoga keldi.
Alarkonning adabiy faoliyati Guadisa shahrida o‘zi asos solgan “G‘arb aks-sadosi” gazetasi uchun va Madridda chiqadigan “Qamchi” gazetasi uchun g‘oyatda o‘tkir va munozarali maqolalar yozish bilan boshlanadi.
Keyinroq u batamom ijodga berilib, she’rlar, hikoyalar, pesalar yoza boshlaydi. Biz bu o‘rinda, gapni muxtasar qilib, adibning bir qator asarlarini sanabgina o‘tishni lozim ko‘rdik. Bular: “Normaning tugatilishi” romani, “Ko‘mirchi-alkald” hikoyasi, “Alpuxorra” she’rlar to‘plami, “Janjal”, “Chaqaloq”, “Uchburchakli shlyapa” qissalari va boshqalardir.
Alarkon asarlarining hammasi ham bir tekisda bo‘lgan deb bo‘lmaydi. U yaratgan asarlarning ayrimlari tez unutib yuborildi. Hatto hozir ham Ispaniyada Alarkonni shoir yoki dramaturg sifatida kamdan-kam odam biladi. Lekin uning nasriy asarlari hozirgi kungacha XIX asr ispan adabiyotining eng katta boyligi, eng nodir namunasi bo‘lib hisoblanib keladi. Bu nasriy asarlardan biri bo‘lgan uning “Uchburchakli shlyapa” qissasi esa juda ko‘p xalqlar tillariga tarjima qilinib jahon kezdi.
“Uchburchakli shlyapa” dunyoga kelganidan keyin oradan yigirma yil o‘tgach kompozitor Gugo Volf bu asar asosida “Korrixidor” nomli komik opera yaratdi. 1917 yilda esa mashhur ispan kompozitori Manuel de Falya “Uchburchakli shlyapa” baletini yozdi. Pablo Pikasso dekoratsiyasi bilan sahnalashtirilgan bu balet jahon xoreografiyasi tarixida eng mashhur spektakllardan biri bo‘lib qoldi. 30-yillar boshida Italiya kompozitori Rikkardor Zandoni bu qissa asosida hazil-opera yaratdi. Oradan yana bir necha yil o‘tgach, “Uchburchakli shlyapa” suratga olinib, kino ekranlarida namoyish qilina boshladi.