2013 yilda Adabiyot bo‘yicha Nobel mukofotiga sazovor bo‘lgan kanadalik hikoyanavis yozuvchi Elis Manro (Alice Ann Munro) 1931 yilda Kanadaning Oktario shahrida fermer Robert Erika Leydlou va maktab o‘qituvchisi Enn Klark Leydlou oilasida tavallud topadi. Elis badiiy adabiyot bilan o‘smirlik chog‘idan shug‘illana boshlaydi va o‘zining “Soya o‘lchovi” ilk hikoyasini 1950 yilda, universitetda o‘qib yurgan chog‘ida chop ettiradi.
Elis Manroning “Baxtli soyalar raqsi” nomli birinchi hikoyalar to‘plami 1968 yilda nashr etilgan. To‘plam kitobxonlar, shuningdek, jamoatchilik tomonidan yuksak baholanib, yozuvchiga shuhrat keltiradi va Kanadaning adabiyot bo‘yicha eng yuksak sovrini “General-gubernator” mukofoti”ga sazovor bo‘ladi. Biri ikkinchisi bilan bog‘liq bo‘lgan hikoyalardan iborat “Ayollar va qizlar hayoti” nomli to‘plam yozuvchining shuhratini yanada oshiradi. Navbatdagi, “Sen kim bo‘libsan?” hikoyalar to‘plami uchun yozuvchi ikkinchi marta “General-gubernator mukofoti” bilan taqdirlanadi. Ana shunday mukofotga 1986 yilda yana bir karra sazovor bo‘ladi. 2009 yilda esa unga Xalqaro Buker mukofoti topshiriladi. Elis Manro jami 20 dan ortiq turli mukofotlar sovrindori.
Yozuvchining ko‘pgina hikoyalari turli tillarda, jumladan, rus tilida chop etilgan. Nobel qo‘mitasi a’zolari Elis Manroni “zamonaviy hikoyalar ustasi” deb baholagan. Aksariyat tanqidchilar Manroning hikoyalari ko‘p hollarda romanlarga xos his- tuyg‘ularga, badiiy teranlikka ega, deya ta’riflashadi. Manro hikoyanavislikda, boshqalardan ayri o‘laroq, o‘ziga xos, ba’zan o‘quvchi anglashi bir muncha murakkab bo‘lgan uslubga ega.
2002 yili yozuvchining katta qizi Sheyla Manro onasining hayoti va o‘zining bolaligi haqidagi xotiralarini nashr ettirgan.
Elis Manroning “Undan olisda” va “Vegasdagi qizlar davrasida” hikoyalari asosida badiiy filmlar yaratilgan.