Ingliz adibasi Doris Mey Teylor Lessing (Doris May Lessing) 1919 yilning 22 oktyabrida Erondagi Kirmon shahrida tug‘ilgan. 1925 yili ota-onasi bilan Janubiy Rodeziya (hozirgi Zimbabve) ga ko‘chib ketadi. Bu mamlakat o‘sha vaqtda Angliyaning mustamlakasi edi. Afrikaning eng chekka, qoloq o‘lkasida o‘tkazilgan bolalik keyinchalik adiba uchun bitmas-tuganmas ilhom manbai bo‘ldi.

1949 yili Doris Londonga ko‘chib o‘tdi.

1950 yili Lessingning birinchi romani «Maysalar kuylaydi» bosildi. Bu asar T.S. Eliotning «Unumsiz yer» dostonidan ilhom olib yozilgan. Roman irqchilik davridagi Rodeziya jamiyatining o‘ziga xos badiiy solnomasi sifatida olqishga sazovor bo‘ldi.

Shundan so‘ng adiba «Zo‘ravonlik farzandlari» nomli asarlar turkumini yoza boshladi. Bu turkumga «Marta Kvest» (1952), «Munosib nikoh» (1954), «Po‘rtanadan keyingi mavj» (1958), «Quruqlik qurshovida» (1966), «To‘rt darvozali shahar» (1969) romanlari kirgan. «Oltin kundalik» (1962) romani ham adibaga katta shuhrat keltirdi.

«Jahannam uchun yo‘riqnoma» (1971) va «Kunbotar oldidagi yoz» (1973) romanlari o‘quvchini inson qalbining teran nuqtalariga boshlab kiradi. «Kanopus Argosda» turkumi kelajak haqidagi majoziy asarlardan iborat. «Shikasta» (1979), «Uchinchi, to‘rtinchi, beshinchi zonalar o‘rtasida nikoh» (1980), «Siriusdagi tajribalar» (1981), «Sakkizinchi sayyora uchun vakillar qo‘mitasini yaratish» (1982), «Voliyen imperiya-sidagi sentimental agentlarga tegishli hujjatlar» (1983) romanlari kiradi.

Adibaning «Muloyim terrorchi» (1985) romani londonlik siyosatbozlar haqida hikoya qiladi. «Beshinchi farzand» (1988) rivojlanishning ibtidoiy darajasida turgan badbashara bola haqida. Yozuvchi sakkiz yillik tanaffusdan keyin 1996 yilda «Yana muhabbat», 1999 yilda «Mara va Den» nomli futurologik romanlarini e’lon qildi.

Doris Lessing «Yaxshi qo‘shni ayolning kundaligi» (1983) va «Qarilik uddalay olsa edi» (1984) romanlarini Jeyn Somers taxallusi ostida chop ettirdi.

Lessingning hikoyalari, dramalari va publitsistik maqolalari ham mashhur.

1995 yilda Doris Lessing Garvard universiteti doktori unvoniga sazovor bo‘ldi. 1999 yili uning nomi Faxriy kavalerlar ordeniga munosib kishilar ro‘yxatiga kiritildi.

2007 yili Doris Lessing Nobel mukofoti bilan taqdirlandi.