Кербобоев Берди Муродович (Berdy Kerbabaýew) [1894.3(15).3, Тажан тумани Қавқи-Заранг қишлоғи — 1974.5.3, Ашхобод] — Туркманистон халқ ёзувчиси (1967), замонавий туркман адабиёти асосчиларидан. Туркманистон Фанлар академияси академиги. (1951). Бухородаги мадрасада таҳсил олган, Ленинград университети шарқ факультетида ўқиган (1927-28).
Илк ҳажвий шеърлари 1925 йилда «Туркманистон» газетаси ва «Токмак» («Тўқмоқ») журналида босилган. Дастлабки достонлари («Янги турмушга», 1928; «Амударё», 1931), ҳикоя ва очерклари («Марал», 1937), қиссалари («Байрам», 1934; «Ботир», 1935) ва драматик асарлари («Ҳурлиқо ва Ҳамро», 1940 ва б.) туркман адабиёти тараққиётига таъсир кўрсатган. «Қурбон Дурди» қиссаси (1942), «Ойлар» достони (1943), «Ватанга муҳаббат» (1941), «Қардошлар» (1943) каби саҳна асарларида 2-жаҳон урушида босқинчиларга қарши кураш ва туркман халқининг мамлакат ичкарисидаги меҳнати акс этган. «Дадил қадам» (1—3-китоблар, 1940—55) да туркман халқининг ўтмиши, ҳаёти, кураши, руҳий кечинмалари тасвирланган. «Ойсултон» қиссаси (1949) туркман пахтакорларига бағишланган, «Небитдоғ» романи (1957) нефтчилар фаолияти ва ҳаёти ҳақида.
Кербобоев Навоий, Ҳамза, Абдулла Қодирий ва бошқа ижодидан илҳомланган. Ойбек, Ғафур Ғулом ва б.нинг айрим асарларини туркманчага таржима қилган. Кербобоевнинг деярли барча йирик асарлари ўзбек тилида нашр қилинган. «Махтумқули» драмаси (1943; Яшин таржимасида) саҳналаштирилган.Асарлари: Дадил қадам (роман), Т., 1951; Ойсултон, (қисса),Т., 1958; Небитдоғ (роман), Т., 1963; Туркманистон баҳори (шеърлар), Т., 1974.