Модомики, доноларча жавоб беришларини хоҳлар экансан – доноларча савол бер.

* * *

Ҳақиқатни доимо такрорлаб туриш зарур, чунки бизга адашишни ҳам доимо эслатиб туришади.

* * *

Тўғрилик улуғликка жуда яқин туради.

* * *

Агар кимдир янгиликдан сўз очса, одамлар бор кучи билан унга қаршилик қилади. Улар ўзларини бамисоли кар-соқовдек тутишади, янгича қарашга нафрат билан муносабатда бўлишади, шу тарзда янги ҳақиқат ўзига йўл топишига узоқ вақт зарур бўлади.

* * *

Агар осмондаги камалак узоқроқ туриб қолса, унга қарамай қўйишади.

* * *

Дунёни рақамлар бошқармайди.

* * *

Ўғрилар орасида энг зарарлиси аҳмоқлардир. Улар бир вақтнинг ўзида вақтимизни ва кайфиятимизни ўғирлайди.

* * *

Ижодкорни тушуниш – унинг “мамлакати” қонунларини ўрганиш демакдир.

* * *

Кимники тушунсанг, ўшанга тенгсан.

* * *

Назария қуруқ оғочдир, дўстим, лекин яшнар ҳаёт дарахти.

* * *

Шоирни тушуниш учун унинг юртига бориш зарур.

* * *

Кимки ўзга тилларни билмас экан, ўз тили ҳақида ҳам тасаввурга эга бўлмайди.

* * *

Кимки ҳаёт ва эркинлик учун ҳар куни курашса, фақат угина ҳаёт ва эркинликка муносиб.

* * *

Тартибсизликдан кўра адолатсизлик маъқул.

* * *

Агар кимда-ким барча қонунларни ўрганишни хоҳласа, унинг қонунларни бузишга вақти бўлмайди.

* * *

Жазолашга қодир бўлмаган ҳакам охир-оқибатда жиноятга шерик бўлади.

* * *

Қонун қудратли, бироқ эҳтиёж янада кучлироқ.

* * *

Туйғулар алдамайди, мулоҳаза алдайди.

* * *

Кўпчиликдан кўра ёқимсизроқ ҳеч нарса йўқ.

* * *

Ожиз одамларда кўпинча инқилобий эътиқод пайдо бўлади; улар агар бизни бошқаришмаганда, яхши бўларди, деб ўйлайдилар ва на бошқаларни, на ўзларини бошқаришга қодир эмасликларини англаб етмайдилар.

Дафна бутоғи шон-шуҳратдан кўра кўпроқ азоб-уқубат, изтироб рамзидир.

* * *

Ҳар ким нима учун туғилган бўлса, ўша юмуш билан шуғулланганлиги энг оқилона ишдир. Кимки узоқ ўйлар экан, ҳамма вақт ҳам тўғри ечимни топавермайди.

* * *

Кимки кўп нарсани талаб қилса ва мураккабликдан ҳузур қилса, бундай одам адашишларга бошқалардан кўра кўпроқ мойилдир.

Фойдали хатодан зарарли ҳақиқатни афзал биламан: ҳақиқат, балким, ўзи келтириб чиқарган оғриқни даъволайди.

* * *

Сув бор бўлган барча жойда қурбақа бўлавермайди; бироқ қаерда қурбақа бўлса, у ерда сув бўлиши мумкин.

* * *

Зўравонликнинг икки тинч тури бор: ҳуқуқ ва одоб.

* * *

Агар биз ўзимизни ўзганинг ўрнига қўйиб кўрсак, бошқаларга нисбатан рашк ва нафратимиз йўқолган бўлур эди; агар биз бошқаларни ўзимизнинг ўрнимизга қўйиб кўрсак, биздаги манманлик ва ғурур пасайган бўлур эди.

* * *

Миллионлаб китобхонга эга бўлишга умид қилмаган ёзувчи бирон сатр ҳам ёзмаслиги лозим.

* * *

Пулни йўқотиш – катта йўқотиш эмас. Яна пул ишлашга шошил. Ор-номусни йўқотиш – катта йўқотиш. Шон-шуҳрат қозонсанг, одамлар ўз фикрини ўзгартиради. Мардликни йўқотиш – барча нарсани йўқотиш. У ҳолда бу дунёга келмаганинг яхшироқ бўлар эди.

* * *

Инсон ўз кучидан фойдаланмагунча, нимага қодирлигини билмайди.

* * *

Энг кулгили истак –барчага ёқиш истаги.

* * *

Икки киши баҳслашар экан, кўпроқ айбдор бўлганни ожиз деб ҳисоблайдилар.

* * *

Бизнинг эҳтиросларимиз қақнусга ўхшайди.

Бир эҳтирос ёниб кул бўлганда,

Кукундан янгиси туғилади.

* * *

Қарама-қарши фикрлар ўртасида ҳақиқат ётади дейдилар. Бўлмаган гап! Улар ўртасида муаммо ётади.

* * *

Одамлар сенга мослашишини талаб қилиш – кечириб бўлмас аҳмоқлик.

* * *

Саройдаги ҳаёт – ҳар ким ўзига ажратилган мақомга риоя қилиши ва вақти-вақти билан сукут сақлаши керак бўлган оркестрдир.

* * *

Инсон жаҳон муаммоларини ҳал қилиш учун туғилмагандир, балки?

* * *

Табиатнинг буюклиги ва оддийлиги шундаки, у ўзининг улуғ ҳодисаларини сўзсиз кичик ҳодисаларда такрорлайди.

* * *

Тақдир томондан танланганлар ўз авлодига бошчилик қилади, баъзиларининг таъсири узоқ давом этади, бироқ кўпчилиги янги етакчиларга ўрин бўшатиб беради ва авлодлар уларни унутади.

* * *

Аслида бизни ҳайратга соладиган нарсаларнигина ўқиш зарур.

* * *

Жоҳилликнинг биринчи белгиси – гўзалликни эътироф этмаслик.

* * *

Душманларнинг ҳужумлари одамларнинг ожиз томонларини билиб олишда менга ёрдам берди.

* * *

Агар халқда буюк ислоҳотга эҳтиёж ҳақиқатан ҳам пайдо бўлган бўлса, худо ҳам унинг томонида бўлади ва муваффақият унга ёр бўлади.

* * *

Мен умумнинг фаровонлиги учун хизмат қиладиганга хизмат қиламан.

* * *

Ҳақиқий истеъдод ато қилинган киши буюк ўтмишдошлар билан муомала қилишга ички эҳтиёж сезади ва ушбу эҳтиёж унинг юксак истеъдодидан далолат беради.

Акмал Саидов тайёрлади.

“Жаҳон адабиёти” журнали, 2009 йил, 9-сон.