Hayitboy Abdusodiq – Qoraqalpog‘istonda xizmat ko‘rsatgan jurnalist. 1957 yilda tug‘ilgan. Toshkent davlat universitetining (hozirgi O‘zMU) jurnalistika fakultetini tamomlagan. Ijodkorning “Meni kashf eting”, “Yorug‘lik istagi”, “Aslim, aslim xo‘ja eli”, “Tirik tug‘ilgan oy” nomli she’riy kitoblari nashr etilgan.
Ota yurt
Ko‘zlarimni yumsam
ko‘z oldimda paydo bo‘lasan,
Ko‘zlarimni yummasam ham
ko‘z oldimda paydo bo‘lasan.
Orziqib kutiladigan hamsuhbat
Kitobning orasida
bir dona yaproq.
Qurib qolgan, sariq tortgan
bir dona yaproq.
Har safar menga shuni
ko‘rsatasan
Va har safar xotiralaring
so‘zlab berasan,
Va har safar men
sen aytayotgan tollarning
kesilib ketganini
aniq bilsam-da,
indamayman atayin.
Qadrning nisbiyligi
Uy to‘rida turibman, deb,
gerdayma sandiq,
Sening qadring ichingdagi
mollarga bog‘liq.
Eski sir –
ikkovimizni
bog‘lab turgan
birdan-bir
tugun.
Ruhiy po‘rtana
Bundayin po‘rtanaga
dunyo chidolmas,
qo‘llar chidolmas,
ko‘zlar chidarkan.
Hazrati eshik
Hamma ishdan xabardor:
u yonning salomini olg‘uvchi,
bu yonning salomini olg‘uvchi.
O‘rtadagi qo‘sh tutqichli
hazrati eshik.
Erga og‘irlik
Hammamiz ham vazmin tortib,
o‘zimizni bosaversak,
erga og‘irlik tushmasmi?
Noaniq nuqta
Kecha so‘roq bo‘lib ko‘rindi,
bugun undov,
ertaga qanday
ko‘rinarkan
bu nuqta?
Ming jonli
Ming jonli oshiqman,
visol sari jonim
bir son ko‘payar.
Har hijronda
ozayar birga.
Kuch
Quyosh nuri suvda
sinadi.
Mening nurim
ko‘zlaringda.
Ushalmagan orzularim
Armon, deydilar-a,
ushalmagan orzularni.
Bor bo‘ling-a,
ushalmagan orzularim.
Ko‘p turing-a,
ushalmagan orzularim.
Ushalmagan orzularim
mening baxtim,
ovunchoqlarim.
Ushalmagan orzularim –
zirhli qo‘rg‘onim.
Yomg‘ir
Erni tozalashga zo‘r berib urinasan:
ba’zi yerlarni tozalaysan ham,
ba’zi yerlarni esa loy qilasan.
Tosh otdi
Inson ekdi daraxtni,
inson ko‘kartirdi.
yana bir inson
unga tosh otdi.
Loqayd odamning qalbi
Uning qalbidan
samimiyatni
zarrabin tutib qidir,
zarrabin.
Qonuniyat
Biz o‘z hukmimizni
o‘qimasdanoq,
tabiat hukmidan
uzilgay yaproq.
Ajab
Ba’zilar dunyoga ustun bo‘lsam, der,
Holbuki, beustun aylanadi yer.
Issiq va sovuq nurlar
Eng issiq nurlarni
odam ko‘zlarida ko‘raman.
Eng sovuq nurlarni ham
odamning ko‘zlarida.
Aytar
Kimdir tushini
juftiga aytar.
Kimdir esa
anhor suviga.
Ayirish va yumshatish belgilari
Bu ayirish belgisi –
ayiradi.
Bu yumshatish belgisi –
yumshatadi.
Yumshatish belgilarini
yaxshi ko‘raman.
Aksil samara
Quloch yoyib,
qamrovni keng
olgan sayin,
toraymoqda ko‘nglimiz.
Hijron
Ko‘chada izg‘irin,
ichda izg‘irin,
dunyoda izg‘irin.
Mungli ko‘zlardan
sizib chiqar,
achchiq ta’mli suv
yuzni qizdirib.