Ёқутхон Раҳимова 1947 йил 1 январда Тошкентда зиёли оиласида таваллуд топган. Ўрта мактабни тугатиб, у одатдагидек, филология ёки журналистика факултетларига эмас, Тошкент Давлат Политехника институтига боради. Уни муваффақиятли тугатиб, муҳандис мақомини олади. Бироқ, унда адабиётга уйғонган ҳавас устун келиб, бадиий ижод соҳасига етаклаб келади.Ёқутхоннинг дастлабки «Кўришгунча, хайр!» номли қис-саси «Шарқ юлдузи» журналида (1979) босилгач, у адабий жамоатчилик ва китобхон эътиборига тушади. Адибанинг «Ғурур» номли илк ҳикоялар тўплами (1978) «Камалак» (собиқ «Ёш гвардия») нашриётида чоп этилган. Шунингдек, унинг ёшлар ва ўсмирлар учун ёзилган «Кўнгил» номли қисса ва ҳикоялар тўплами ҳам нашр қилинган.Ёқутхон Раҳимованинг ўзбек ва рус тилларида чоп қилинган «Бу Сизга, ойижон!» (1987) номли ҳикоялар тўплами болаларга бағишланган. Адибанинг ушбу «Бу Сизга, ойижон!» номли тўпламидаги жажжи кичкинтойларга аталган ҳикоялари ўзининг беғубор ва ширин тили, содда ва аниқ ифодалилиги билан ёш китобхонларни ўзига ром қилади.Унинг кўпгина ҳикоялари чет ва қардош халқлар тилларига ҳам таржима қилинган.Ёқутхон Раҳимова 1980 йилдан буён Ёзувчилар уюшмасининг аъзоси, Ўзбекистон халқ маорифи аълочиси.У ҳозирги кунда “Ғунча” журналида бош муҳаррир бўлиб ишламоқда.