Таниқли шоир ва драматург Машраб Бобоев 1941 йилда  Самарқанд вилоятининг Пойариқ туманида туғилган. 1956 йилда ўрта мактабни битиргач, аввал жамоа хўжалигида, кейин қишлоқ кутубхонасида ишлади. 1960-1965 йилларда Тошкент Театр ва рассомлик санъати институтининг актёрлик факультетида таҳсил кўрди. Республика халқ ижодиёти уйида услубчи, Самарқанд вилоят халқ ижодиёти уйининг директори, “Ёш гвардия” (ҳозирги “Янги аср авлоди”) ва Ғафур Ғулом номидаги нашриётларда муҳаррир бўлиб ишлади. Республика радиоси “Шарқ юлдузи” журнали, Ўзбекистон Ёзувчилар уюшмасида фаолият кўрсатди. Театрларда адабий эмакдошлик қилди. Маданият ишлари вазирлигида репертуар бўлими мудири, Ўзбекистон Миллий ахборот агентлиги таржима таҳририятининг бош муҳаррири бўлиб ишлади.Машраб Бобоев ўтган асрнинг 60-йилларидан Республика матбуотида шоир ва адиб сифатида танила бошлади. Илк шеърий тўплами “Онамга хат” 1971 йилда нашр этилди. Сўнгра “Баҳор кайфияти”, “Сўз”, “Олисдаги чироқ”, “Бағишлов”, “Мен билган сир” каби бир қанча шеърий тўпламлари босилиб чиқди. “Кечки троллейбус”, “Гурунг” ҳикоялар тўпламлари чоп этилди. Машраб Бобоев жами ўндан ортиқ саҳна асарлари яратган истеъдодли драматург эди. Унинг “Ўттиз ёшлилар”, “Ер томири”, “Гурунг”, “Онаизор” каби драмалари республикамиз театрларида саҳналаштирилди ва “Номсиз юлдузлар”, “Қани менинг юлдузим” деб аталувчи тўпламлар сифатида нашр этилди. Айниқса, Машраб Бобоев сценарийси асосида суратга олинган кўп қисмли “Кўнгил кўчалари” видеофильми томошабинлар орасида шуҳрат қозонди. Машраб Бобоев моҳир таржимон ҳам эди. У А.Пушкин, Р.Ҳамзатов ва бошқа шоирларнинг шеърларини, бир қатор драматургларнинг асарларини ўзбек тилига маҳорат билан ўгирган эди. Ўз навбатида унинг асарлари ҳам хорижий тилларга таржима қилинган. Машраб Бобоевнинг 1995 йилда “Ўзбекистонда хизмат кўрсатган маданият ходими” фахрий унвонига сазовор бўлган эди. Машраб Бобоев 2003 йили вафот этган.