Otomo Tabito (大伴 旅人 – 662/665 — 731) — yapon shoiri, shoir Otomo Yasumaroning o‘g‘li, shoir Otomo Yakamotining otasi.

* * *

Mana, uyga qaytmoq
Oni ham yetdi…
Biroq olis o‘sha makonda
Qolganmikin bir muattar qo‘l
Boshimni silar.

* * *

Kusakae bo‘g‘ozi qiyoqzorida
Xo‘rak titgan turna misoli
Tentirab yuribdi xuddi o‘zimdek –
Do‘stim. Qanchalar og‘ir
Qanchalar azobdir uni eslamoq.

* * *

Bunchalar olissiz, poytaxt yo‘llari,
Sevgilimga eltgulik qadar.
Men esa har kech
Ont ichaman bir go‘zal haqqi
Sizni tushlarimga olib kirgali.

Rus tilidan Abdu Nabi tarjimalari

* * *

O‘sha bog‘da bir zamon
Sevgilim-la ikkovlon
Ekkan nihol bo‘y cho‘zib
Bo‘yimizdan ham o‘zib,
Endi shox yozmish chunon!

* * *

Mana, keldi vaqti ham
Uyga qaytadigan dam…
Lekin poytaxtda endi
Kimning muattar yengi
Bolish bo‘lardi, erkam.

* * *

Kusakae ko‘rfazi
Qamishzorida yakka
Balchiq titgan turnaday
Men ham yolg‘iz… Eh, og‘ir!
Do‘stsiz ko‘p og‘ir, axir!

Rus tilidan Fayzi Shohismoil tarjimasi.