Жўш Малиҳободий (1898-1982)

Шоирнинг тўлиқ исми – Жўш Шобир Ҳасанхон Maлиҳободий (جوش ملیح آبادی). Аградаги коллежда араб ва форс тиллари бўйича таҳсил олган. 1958 йилда Ҳиндистондан Покистонга кўчиб келган. Шундан кейин Жўш тахаллуси билан ғазаллар ёза бошлаган. Унинг “Нақшлар ва суратлар”, “Аланга ва шабнам”, “Сумбул ва занжир” каби шеърий китоблари урду тилидаги шеърият ихлосмандларига яхши таниш.

АНГЛОЛМАДИМ СЕНИ БАРИБИР

Тонг жамолинг акси бўлса ҳам,
Нуринг юлдуз олиб келса ҳам,
Англолмадим сени барибир!

Дунё иши сабоқ ҳар куни,
Бугунги тахт сомон бир куни,
Англолмадим сени барибир!

Қабристонда ажиб манзара,
Шоҳу гадо ёнма-ён, қара,
Англолмадим сени барибир!

Боғда гўзал ғунча очилди,
Бир кулдию сўнгра сочилди,
Англолмадим сени барибир!

Ҳаёт юзлаб қувонч бахш этди,
Ўлим келди ювдию кетди,
Англолмадим сени барибир!

Ҳар заррада мўъжиза дилда,
Ҳар лаҳзада шамолда жилва,
Англолмадим сени барибир!

Овоз келди забонсиз тундан,
“Жўш, уйғонгин энди уйқудан”,
Англолмадим сени барибир!

Рус тилидан Азиз Саид таржимаси