Юсуф Вазир Чаманзаминли Озарбайжон маданиятида ўчмас из қолдирган адиблардан. У 1887 йили Шуша шаҳрида туғилган. 1915 йили Киевдаги Император университетининг ҳуқуқшунослик факультетини тугатган. Шундан сўнг у турли сиёсий ва дипломатик лавозимларда ишлади.Чаманзаминли бир қатор ҳикоялари, “Студентлар” (1919), “Ўтмиш саҳифалари” (1926), «Қон ичра», “Зулматдан зиёга” (1933), “Қизлар булоғи” (1934), “1917 йил” (1939) романлари билан шуҳрат қозонди. “Қизлар булоғи” романи адиб ижодида алоҳида ўрин тутади.