Xose Millas (to‘liq ismi: Xuan Xose Millas Gartsiya (Juan José Millás), 1946 yil 31 yanvarda Valensiyada tug‘ilgan) — ispan yozuvchisi va jurnalisti. Uning yigirmadan ortiq tilga tarjima qilingan hikoya janridagi asarlari ispan olamining eng nufuzli adabiy mukofotlari bilan taqdirlangan.

Valentsiyalik ixtirochi Visente Millas Mossi va Kandida Gartsiyalarning o‘g‘li, Xuan Xose Millas Gartsiya hayotining birinchi yillarini Valentsiyada o‘tkazgan, 1952 yilda oilasi bilan Madridga ko‘chib o‘tadi va u yerda kunduzi omonat kassada ishlab, universitetda falsafa va adabiyot yo‘nalishida kechki bo‘limda ta’lim ola boshlagan. Ammo uchinchi kursda o‘qishni tashlab ketishga majbur bo‘ladi va Iberia aviakompaniyasida dastlab ma’muriy lavozimda, keyinroq aloqa idorasida ishlaydi. Bir vaqtning o‘zida u matbuot bilan ham hamkorlik qiladi. Matbuotda muvaffaqiyatga erisha boshlagach, o‘zini butunlay adabiyotga bag‘ishlashga qaror qiladi. 1990 yillardan u Ispaniyaning bir qancha nufuzli ommaviy axborot vositalari bilan hamkorlik qila boshlagan.

1975 yilda u o‘zining birinchi romani «Serbero son las sombras»ni yozgan va Sesamo mukofotiga sazovor bo‘lgan. Bu asar otaga yozilgan uzun maktubdan iborat, unda hayotining beg‘ubor bolalik va og‘riqli damlari qiziqarli tasvirlangan. Ayniqsa, uning “Papel mojado” (1983) nomli asarini Ispaniya Bolalar va yoshlar bo‘limi o‘rta ta’lim o‘quv dasturi uchun tavsiya etilgan adabiyotlar ro‘yxatiga kiritgan.

Xose Millasning navbatdagi «Laura va Xulio» romanida muallifning asosiy g‘oyalari: o‘ziga xoslik, simmetriya, yolg‘izlik, o‘z olamidan boshqa olamda yashash, sevgi, sadoqat va hasad kabi insoniy-noinsoniy tuyg‘ular qamrab olingan.

1990 yildan “El Pais” gazetasida kolumnist sifatida ish boshlagan Xose Millasning tilga g‘amxo‘rlik mazmunidagi va odamlarni hokimiyat va bozor mafkurasidan himoya qiluvchi ommabop va tanqidiy maqolalari uzluksiz chop etilib bordi.

Uning radiodagi faoliyati ham mashhurlikka erishgan. Mamlakatda eng ko‘p tinglanadigan Kadena Ser radiosining “La ventana” dasturida tinglovchilarni lug‘atdagi so‘zlar qatnashgan qisqa hikoyalar tuzishga undovchi bo‘limini yuritgan; va buning natijasi o‘laroq katta lug‘at ham tuzilgan.

Uning keng ko‘lamli, yigirmadan ortiq tilga tarjima qilingan asarlari asosan ruhan ichki «men»ga quloq tutish hamda har qanday kundalik oddiy voqeani g‘ayrioddiy hodisaga aylantira olganligi bilan mashhurdir. Ushbu yo‘nalishni rivojlantirish orqali Xose Millas yangi adabiy janr – artisuentos (hikoya-maqola) janriga asos soldi. Muallifning o‘zi bu janrni «marvarid qobig‘iga o‘ralgan kundalik syurrealizm xronikasi» deb ta’riflagan va bu kichik hikoyalarda u oddiy hayotiy epizodlarni mahorat bilan ifodalagan, o‘ziga xos uslubda hayotiy haqiqatlarni yorita olgan.

Millas ko‘plab e’tirof va mukofotlarga sazovor bo‘lgan, ular orasida Ispaniyadagi eng muhim, Nadal, Planeta va Nasional de Narrativa kabi mukofotlari bor.