Украина мумтоз адабиётининг таниқли вакили Григорий Фёдорович Квитка-Основьяненко (Григо́рій Фе́дорович Кві́тка-Основ’я́ненко) XIX асрнинг биринчи ярмида ижод қилган адибдир. У Харьков шаҳри яқиндаги Основа қишлоғида таваллуд топди. Адабий тахаллуси Гриенко Основьяненкодир. 1827 йилда Квитка “Пойтахтдан келган жаноб ёки уезд шаҳрида юз берган машмаша” комедиясини ёзади. Бу комедияда жамоатчилик ишларида бўлиб турадиган жиноятлар, шунингдек, мансабдор маъмурлар ҳамда заминдорларнинг қиёфалари ҳажвий мисраларда тасвирланган эди.
Шу пайтдан бошлаб Квитка-Основьяненконинг ҳаёти ва ижодида янги давр бошланади. У Петербург ва Москванинг таниқли адиблари, адабиётшунослари билан, “Современник” ҳамда “Отечественние записи” журналлари ва бошқа нашриётлар билан алоқа боғлади. Унинг асарлари журналлар ва нашриётларда чоп этила бошлайди. Унинг ҳанузгача Украина театрлари саҳналарида намойиш қилиниб келаётган “Шелменко бўлис мирзаси”, “Шелменко – деншчик” пьесалари, “Гончаровкада совчилик” комедияси ва иккита китобдан иборат “Малороссия қиссалари”да муаллифнинг реалистик тасвирга мойиллиги яққол кўзга ташланиб туради.
Квитка-Основьяненко ўз асарларида казак мансабдорларининг ақли ноқислиги, фаҳм-фаросатсизлигини фош қилиш, бадмастлик, мечкайлик ва шу сингари ўзга иллатларни қоралаш билан бирга (“Конотоплик жодугар”, “Ўликлар пасхаси”, “Ёлғончи” қиссалари), оддий халқ намояндаларини теран ҳурмат-эҳтиром билан тилга олади. Жумладан, “Маруся”, “Бало” қиз”, “Шўрлик Оксана” қиссаларида уларнинг машаққатли турмушларини ёрқин лавҳаларда акс эттиради.
“Пан Холяковский” романи адибнинг энг машҳур асарларидан биридир. Муаллиф бу асарида Украина дворянларининг жоҳиллик, нодонлик, танбаллик, текинхўрлик иллатларини ҳажвий йўлда зўр маҳорат билан тасвирлаб беради.
В.Белинский Квитка-Основьяненконинг ҳажвчилик истеъдодини эътироф этган. Т.Шевченко унинг носирлик ижодини юксак баҳолаган.