Чилилик машҳур адиба Иcабель Альенде 1942 йилда Перу пойтахти Лима шаҳрида тавуллуд топган. У Чилининг собиқ президенти Салвадор Альенденинг жияни. Ижодий фаолиятини журналист сифатида бошлаган. 1973 йилда амакиси Салвадор Альенде ўлдирилгач, Иcабель Альенде Чилини тарк этиб, Венесуэладан паноҳ топади. Унинг 1985 йилда ёзилган илк романи  –  “Руҳлар уйи” танқидчилар ва кенг китобхонлар эътиборига тушиб, бестселлерга айланади. Кейинчалик ёзилган “Муҳаббат кўланкаси” (1987), “Ева Луна” (1987), “Буюк режа” (1993),  “Паула” (1995), “Тақдир қизи” (1999), “Зорро” (2005) каби асарлари ҳам адабиёт ихлосмандлари қалбидан жой олди. Иcабель Альенденинг асарлари хаёлот ва афсоналардан фойдаланиладиган магик (сеҳрли) реализмда ёзилган. Уни айнан магик реализмда ижод қилган Габриэл Гарсиа Маркес билан солиштиришади.Уч набиранинг бувиси бўлган Иcабель Альенде 2003 йилда болалар учун мўлжалланган “Ёввойилар шаҳри” ҳамда “Олтин аждар қироллиги” шунингдек 2005 йилда “Миттивойлар ўрмони” асарларини чоп эттирди. Иcабель Альенде 2010 йилда Адабиёт соҳасидаги хизматлари учун Чили Миллий Мукофотини қўлга киритган. 2014 йилда эса “Озодлик” медали билан тақдирланган.